UBS duhet të largohet nga Zvicra, thotë një nga aksionarët kryesorë

(KEYSTONE/Michael Buholzer).

Artisan Partners, një aksioner i UBS-së, i ka bërë thirrje bankës zvicerane të largohet nga vendi, duke argumentuar se institucioni financiar përballet me një “realitet të zymtë” për shkak të rregullave më të rrepta mbi kapitalin.

“Fakti i thjeshtë është se Zvicra nuk është më një vendndodhje tërheqëse apo e dëshirueshme për UBS-në,” shkruan në një letër drejtuar bordit të UBS-së menaxherët e portofolit të Artisan Partners, përfshirë Daniel O’Keefe.

Artisan Partners deklaroi se menaxhon kolektivisht më shumë se 60 milionë aksione të UBS-së në emër të klientëve, që përbëjnë rreth 1.8% të totalit të aksioneve në qarkullim të bankës.

Në fillim të këtij muaji, dhoma e lartë e parlamentit zviceran (Senati) mbështeti papritur një plan që, sipas bankës, do të kërkonte 16 miliardë dollarë shtesë në kapitalin CET1, raporton swissinfo. Procesi kalon tani në dhomën e ulët, ku plani mund të zbutet, dhe nuk pritet të merret ndonjë vendim para vitit të ardhshëm.

UBS e kundërshtoi vendimin, duke deklaruar se ai “nuk përbën një kompromis”, transmeton albinfo.ch.

“Siç kemi deklaruar vazhdimisht, qëllimi ynë është të vazhdojmë të operojmë me sukses si një bankë globale me bazë në Zvicër,” tha një zëdhënës i UBS-së në një deklaratë të veçantë pas letrës së Artisan Partners.

“UBS do të mbrojë interesat e aksionerëve të saj duke vazhduar të ofrojë fakte dhe analiza për të mbështetur vendimmarrjen e informuar dhe duke mbrojtur rregullore që janë vërtet të targetuara, proporcionale dhe të harmonizuara ndërkombëtarisht, si dhe që adresojnë shkaqet rrënjësore të krizës së Credit Suisse.”

Sipas letrës, Artisan Partners vlerësoi se ky veprim mund të çonte në një humbje të kapitalizimit të tregut prej rreth 36 miliardë dollarësh. Ata theksuan se, nëse banka do të operonte në një juridiksion me rregulla të ngjashme me ato aktuale të Zvicrës, ai kapital mund të përdorej për të gjeneruar një kthim prej 15%.

Artisan Partners ka lobuar më parë për ndryshime strategjike edhe në kompani të tjera zvicerane, siç është Novartis.