Pse kompanitë e mëdha po largohen nga Cyrihu?

Ekspertët kanë shprehur shqetësimin për një largim masiv të kompanive nga Cyrihu, një qytet i njohur prej kohësh si qendër bankare dhe financiare.

Përfaqësues të biznesit në Cyrih kanë vënë re një trend të ri në qytetin më të madh të Zvicrës: kompanitë po largohen për t’u zhvendosur diku tjetër.

Një vështrim në mediat zvicerane gjatë muajve të fundit e mbështet padyshim këtë ide.

Së pari, “Vontobel Bank” po largohet nga Cyrihu, e ndjekur nga “Cembra Money Bank”.

Grupi i teknologjisë mjekësore “Zimmer Biomet” po shkurton qindra vende pune në Winterthur, dhe vende pune po humbasin gjithashtu edhe te “Burckhardt Compression”.

Çdo biznes apo kompani ka arsyet e veta për zhvendosje, por disa në Cyrih druhen se qyteti po e humbet tërheqjen e tij si vendndodhje për biznesin.

Për Charlotte Jacquemart, redaktore e biznesit në SRF, normat e taksave duket se luajnë një rol në këtë çështje.

Ajo thekson se në Baar, ku po zhvendoset “Vontobel” dhe ku “Zimmer Biomet” ngriti bazën e saj evropiane në vitin 2020, norma e tatimit mbi fitimin e korporatave është rreth 12 për qind.

Në Cyrih, për krahasim, ajo është 19.5 për qind, një nga normat më të larta në vend.

Në Baden, ku po zhvendoset “Cembra”, norma është rreth 15 për qind.

Të tërhequra nga zonat me taksa më të ulëta, kompanitë mund të kursejnë dhjetëra miliona thjesht duke u zhvendosur. Përveç kësaj, shpesh edhe kostot e tjera janë më të ulëta, siç janë qiraja apo shpenzimet për infrastrukturën.

Kjo do të thotë, shkruan Jacquemart, se qyteti po humbet të ardhura nga taksat, ndërkohë që kostot e infrastrukturës mbeten të larta.

“Rreziku më i madh qëndron në faktin se edhe firma të tjera mund të ndjekin të njëjtën rrugë, shkruan thelocal. Ato mund t’i thonë vetes: nëse kompanitë e mëdha po i zhvendosin selitë e tyre në kantonet që rrethojnë Cyrihun, le ta shqyrtojmë edhe ne këtë mundësi. Kjo mund të bëjë që largimi nga qyteti i Cyrihut të kthehet në një trend,” shkruan ajo, transmeoton albinfo.ch.

Megjithatë, normat e taksave nuk janë arsyeja e vetme pse bizneset po i kthejnë shpinën Cyrihut. Rol luajnë gjithashtu çështje të tilla si problemet me trafikun, qiratë jashtëzakonisht të larta, si dhe mungesa e hapësirave për zyra apo e banesave me çmime të përballueshme për punonjësit.

---