Specialja dhe presidenti përplasin partitë, Kosova hyn në orët vendimtare

Projektligji për ndryshimin e Ligjit për Dhomat e Specializuara kaloi leximin e parë me 91 vota, por partitë nuk arritën marrëveshje për votimin përfundimtar dhe zgjedhjen e presidentit.

Kosova ka hyrë në orët vendimtare të një tjetër përplasjeje politike, me dy çështje të rëndësishme institucionale që kanë mbetur pezull: ndryshimet në Ligjin për Dhomat e Specializuara dhe zgjedhja e presidentit të ri të vendit, përcjell albinfo.ch. 

Kuvendi i Kosovës e miratoi të hënën, me 91 vota për, asnjë kundër dhe asnjë abstenim, në lexim të parë Projektligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar. Megjithatë, procesi nuk u përmbyll, pasi projektligji ende duhet të kalojë edhe në lexim të dytë.

Ndryshimet e propozuara nuk nënkuptojnë shpërbërjen e Gjykatës Speciale në Hagë dhe nuk i ndalin procedurat e apelit për ish-krerët e UÇK-së të dënuar në shkallën e parë.

 

PDK kërkon votimin e dytë, LVV kushtëzon me presidentin

Pas miratimit në lexim të parë, PDK-ja kërkoi që projektligji të votohej edhe në lexim të dytë gjatë së njëjtës ditë.

Kjo nuk ndodhi. Kryetarja e Kuvendit, Albulena Haxhiu, kërkoi që fillimisht të arrihej një pajtueshmëri për zgjedhjen e presidentit, duke e cilësuar këtë çështje si urgjente për shkak të skadimit të afatit kushtetues më 6 tetor.

PDK-ja, e cila ka iniciuar ndryshimet ligjore, ka insistuar që fillimisht të përfundojë procesi për Ligjin për Specialen dhe më pas të procedohet me zgjedhjen e presidentit. Kryetari i saj, Bedri Hamza, ka deklaruar se partia është e gatshme të diskutojë për zgjedhjen e presidentit pas miratimit përfundimtar të ndryshimeve ligjore.

 

Takimi Kurti-Hamza përfundon pa marrëveshje

Në përpjekje për të gjetur një zgjidhje, kryeministri dhe lideri i LVV-së, Albin Kurti, është takuar me kryetarin e PDK-së, Bedri Hamza.

Takimi ka përfunduar pa marrëveshje për dy çështjet kryesore – procedimin e mëtejshëm të ndryshimeve në Ligjin për Specialen dhe zgjedhjen e presidentit.

Kështu, Kuvendi e ka mbyllur seancën pa e zhvilluar votimin e dytë për projektligjin, ndërsa çështja e presidentit ka mbetur ende e pazgjidhur.

 

Protesta përshkallëzohet në Prishtinë

Ndërkohë, protesta e zhvilluar prej ditësh para Kuvendit, në mbështetje të ndryshimeve ligjore, u përshkallëzua gjatë mbrëmjes.

Protestuesit hodhën mjete piroteknike dhe mjete të tjera në drejtim të institucioneve dhe Policisë, ndërsa Policia ndërhyri me gaz lotsjellës dhe top uji për shpërndarjen e turmës. Sipas Policisë, gjatë përplasjeve u lënduan gjashtë zyrtarë policorë, ndërsa tre protestues u shoqëruan në stacion.

Policia tha se ndërhyrjet u bënë pasi një pjesë e protestuesve shfaqën dhunë dhe nuk iu bindën thirrjeve për qetësi. Për shkak të situatës, në intervale të ndryshme u bllokua edhe qarkullimi në disa rrugë në qendër të Prishtinës.

Protestuesit kërkuan që ndryshimet në ligj të miratohen edhe në lexim të dytë dhe deklaruan se do të qëndronin para Kuvendit derisa procesi të përfundonte.

 

Afati për presidentin përfundon më 6 tetor

Në anën tjetër, Kosova përballet me një tjetër afat kushtetues. Kuvendi duhet ta zgjedhë presidentin e ri deri më 6 tetor.

Nëse kjo nuk ndodh brenda afatit, sipas interpretimit të përcaktuar nga vendimi i Gjykatës Kushtetuese, Kuvendi shkon drejt shpërndarjes dhe vendi drejt zgjedhjeve të reja parlamentare.

Kjo e ka bërë edhe më të ndërlikuar përplasjen ndërmjet partive, pasi PDK-ja e ka lidhur mbështetjen për zgjedhjen e presidentit me miratimin përfundimtar të ndryshimeve për Specialen, ndërsa LVV-ja kërkon që fillimisht të zgjidhet kreu i shtetit.

 

Guxo i bën thirrje LDK-së për marrëveshje

Në përpjekje për të shmangur një krizë të re institucionale, kryetari i Partisë Guxo, Faton Peci, i ka bërë thirrje Lidhjes Demokratike të Kosovës për reflektim dhe angazhim të përbashkët.

Peci ka theksuar se kanë mbetur vetëm pak orë për të gjetur një zgjidhje dhe për të mundësuar zgjedhjen e presidentit.

Sipas tij, zgjedhja e presidentit do të mundësonte kompletimin e institucioneve të larta të vendit dhe do të kontribuonte në stabilitetin institucional.

Me afatin kushtetues që skadon më 6 tetor, mbetet e hapur nëse partitë do të arrijnë një marrëveshje në orët e fundit apo Kosova do të shkojë drejt një tjetër procesi zgjedhor./Albinfo.ch

---