Kurti del në konferencë për media në orën 15:00

Kryeministri i Kosovës, Albin Kurti, do të mbajë sot konferencë për media, në një ditë të rëndësishme politike për vendin.

Kryeministri Albin Kurti do të mbajë sot, në orën 15:00, konferencë për media në Zyrën e Kryeministrit, ka njoftuar zëdhënësi i Qeverisë, Arlind Manxhuka, transmeton albinfo.ch.

“Sot, 15:00, Kryeministri Kurti mban konferencë për media. Konferenca mbahet në Zyrën e Kryeministrit. Ftojmë mediat ta përcjellin!”, ka njoftuar Manxhuka.

Konferenca e Kurtit zhvillohet në ditën e fundit të afatit për zgjedhjen e presidentit të Kosovës, ndërsa sot është gjithashtu dita e fundit kur kjo legjislaturë mund të votojë në lexim të dytë Projektligjin për Gjykatën Speciale.

Dalja e kryeministrit para mediave vjen në kohën kur në Prishtinë po zhvillohet protesta e thirrur nga platforma “Jo në emrin tim”, ku ndër kërkesat kryesore është votimi i këtij projektligji.

Protesta e sotme vjen një ditë pas përplasjeve mes Policisë së Kosovës dhe protestuesve, ndërsa gjatë mbrëmjes pati akuza për përdorim të forcës dhe pretendime për ndërhyrje politike në veprimet e Policisë.

Konferenca e Kurtit pritet të sjellë sqarime lidhur me zhvillimet politike të ditës dhe situatën e krijuar rreth zgjedhjes së presidentit dhe Projektligjit për Gjykatën Speciale./Albinfo.ch

---