Mbi 60 minatorë dyshohet se kanë mbetur të bllokuar në Trepçë

Rreth 63 minatorë raportohet se kanë mbetur të bllokuar mbrëmjen e së mërkurës në horizontin e 11-të të minierës së Trepçës në Mitrovicë.

Sipas raportimeve, incidenti ka ndodhur pas një zjarri në trafon e energjisë elektrike në Tunelin e Parë, duke shkaktuar ndërprerje të energjisë dhe pamundësuar daljen e menjëhershme të minatorëve nga nëntoka.
Në vendin e ngjarjes janë angazhuar ekipet e zjarrfikësve, ndërsa operacioni për nxjerrjen e minatorëve pritet të zgjasë.

Fillimisht ishte raportuar se më shumë se 50 minatorë ndodheshin të bllokuar në këtë pjesë të minierës, ndërsa më pas numri i raportuar arriti në 63.

Kryeshefi i Trepçës, Faton Ahmeti, kishte deklaruar më herët se numri i saktë i minatorëve do të mund të konfirmohej pasi të merrte informacionet nga ekipet në terren. Ai ka bërë të ditur se do të jepte më shumë detaje sapo të kishte informacione të reja.