63 minatorë të ngujuar në Trepçë, gjendja e tyre shëndetësore e mirë

63 minatorë të Trepçës vazhdojnë të jenë të ngujuar në nëntokë, pas një defekti në furnizimin me energji elektrike, ndërsa raportimet e fundit bëjnë të ditur se gjendja e tyre shëndetësore është e mirë.

Minatorët, pjesë e ndërrimit të dytë, kanë mbetur në tunelin e parë të horizontit të 11-të të minierës. Ekipet përkatëse janë duke punuar për nxjerrjen e tyre dhe për sanimin e defektit.

Drejtori i prodhimit në Trepçë, Bujar Jashari, ka deklaruar se gjendja shëndetësore e minatorëve është e mirë dhe se po punohet për rikthimin e energjisë.

Edhe nga ekipet e emergjencës është konfirmuar se minatorët aktualisht janë në gjendje të mirë shëndetësore.

Ndërkohë, komandanti i Zjarrfikësve të Mitrovicës, Bekim Ibishi, ka bërë të ditur se është djegur trafoja kryesore e këtij horizonti.

“63 minatorë janë ngujuar. Trafo është djegur. Jemi duke punuar për nxjerrjen e tyre”, ka deklaruar Ibishi.

Ai ka thënë se nuk ka vend për panik, ndërsa ekipet po shqyrtojnë alternativat për nxjerrjen e minatorëve.

Minatorët vazhdojnë të jenë të ngujuar, por sipas raportimeve të fundit, gjendja e tyre shëndetësore është e mirë.