Kosova renditet e katërta në Ballkan për numrin e pasagjerëve të aeroporteve në raport me popullsinë, duke lënë pas Malin e Zi, Maqedoninë e Veriut, Bullgarinë, Serbinë dhe Bosnjë-Hercegovinën, transmeton albinfo.ch.
Sipas të dhënave të publikuara nga Data4X, Aeroporti Ndërkombëtar i Prishtinës „Adem Jashari” ka regjistruar rreth 4,6 milionë pasagjerë gjatë vitit 2025, ndërsa popullsia e Kosovës llogaritet në rreth 1,58 milionë banorë. Kjo përkthehet në 2.907 pasagjerë për çdo 1.000 banorë.
Në krye të renditjes qëndron Greqia, me 7.551 pasagjerë për 1.000 banorë, e ndjekur nga Shqipëria me 4.185 dhe Kroacia me 3.581.
Pas Kosovës vjen Mali i Zi, me 2.686 pasagjerë për 1.000 banorë. Maqedonia e Veriut regjistron 1.963, Bullgaria 1.796 dhe Serbia 1.389, ndërsa Bosnjë-Hercegovina e mbyll renditjen me 1.032 pasagjerë për 1.000 banorë.
Ky tregues llogaritet duke pjesëtuar numrin vjetor të pasagjerëve të aeroporteve me popullsinë e vendit dhe duke e paraqitur rezultatin për çdo 1.000 banorë.
Megjithatë, shifra nuk nënkupton se të gjithë pasagjerët janë banorë të vendit përkatës. Në të përfshihen edhe udhëtarët e huaj dhe pjesëtarët e diasporës që vizitojnë vendin, ndaj treguesi pasqyron raportin mes qarkullimit ajror dhe popullsisë, e jo numrin e banorëve që udhëtojnë me avion./Albinfo.ch
