Pavarësisht rritjes së çmimeve, zakonet e shpenzimeve të konsumatorëve në Zvicër mbeten të pandryshuara.
Në shtator, treguesi i konsumit i PostFinance, i bazuar në pagesat me kartë të kryera nga 2,4 milionë klientët e saj, u rrit me 0,9% krahasuar me të njëjtën periudhë të vitit të kaluar. Rritja ishte 0,8% në gusht, 1,1% në korrik dhe 1,8% në qershor.
“Shpenzimet e konsumatorëve në Zvicër vazhdojnë të rriten, megjithëse me një ritëm pak më të ngadaltë se gjatë verës,” thanë analistët e PostFinance në një raport të fundit.
Me përfundimin e sezonit të pushimeve, shpenzimet për udhëtime dhe aktivitete shoqërore kanë rënë, gjë që pasqyrohet në uljen e frekuentimit të restoranteve, si në Zvicër ashtu edhe jashtë vendit, shkruan swissinfo. Në të kundërt, konsumatorët shpenzuan dukshëm më shumë për produkte kozmetike dhe trajtime bukurie, transmeton albinfo.ch
“Në përgjithësi, shpenzimet e konsumatorëve mbeten të qëndrueshme, pavarësisht presionit shtesë mbi buxhetet familjare që vjen nga rritja e fundit e inflacionit,” përfunduan analistët e PostFinance.
