Presidentja e Republikës së Kosovës, Justina Shiroka-Pula, me rastin e marrjes së detyrës ka pranuar mesazhe urimi nga presidenti i Italisë, Sergio Mattarella, dhe ai i Kroacisë, Zoran Milanoviq.
Presidenti italian, Sergio Mattarella, ka shprehur dëshirën për thellimin e mëtejmë të bashkëpunimit ndërmjet Kosovës dhe Italisë, duke riafirmuar mbështetjen e vendit të tij për Kosovën teksa ka theksuar se bashkëpunimi mund të marrë një shtysë të re, ndërsa ka përmendur edhe kontributin e Italisë në misionin e KFOR-it, komandën e të cilit, sipas tij, Italia do ta marrë sërish së shpejti.
“Shpresoj gjithashtu që, gjatë mandatit tuaj, Kosova të arrijë përparim konkret dhe të qëndrueshëm në reformat e brendshme të nevojshme për ta afruar vendin me familjen e përbashkët evropiane. Në këtë rrugëtim sfidues, Kosova do të mund të mbështetet në përkrahjen tonë”, thuhet në letrën e tij, transmeton albinfo.ch.
Presidenti i Kroacisë, Zoran Milanoviq, ka shprehur gatishmërinë për vazhdimin e bashkëpunimit me Kosovën, me theks të veçantë në çështjet e sigurisë dhe stabilitetit në rajonin e Evropës Juglindore teksa ka riafirmuar mbështetjen e Kroacisë për integrimin ndërkombëtar të Kosovës, veçanërisht për anëtarësimin në Bashkimin Evropian dhe NATO.
“Kroacia do të vazhdojë të mbështesë integrimin e Kosovës në organizatat ndërkombëtare dhe formatet e bashkëpunimit rajonal, me theks të veçantë në anëtarësimin në Bashkimin Evropian dhe në NATO”, ka shkruar presidenti kroat ndërsa ka shprehur gjithashtu shpresën për një takim të afërt me presidenten Shiroka-Pula, me qëllim të shkëmbimit të pikëpamjeve për zhvillimin e mëtejmë të marrëdhënieve ndërmjet dy vendeve.
