Industria e udhëtimeve dhe turizmit në Evropë pritet të shënojë një rritje 3.1% gjatë vitit 2026, duke tejkaluar ritmet e rritjes së ekonomisë në tërësi dhe nivelin prej 2.6% të regjistruar nga sektori një vit më parë.
Parashikimet janë publikuar nga Këshilli Botëror i Udhëtimeve dhe Turizmit (WTTC), në kuadër të Samitit të 26-të Global, që po zhvillohet në Maltë, me pjesëmarrjen e mbi 1 mijë delegatëve, përfshirë më shumë se 200 drejtues të kompanive më të mëdha të turizmit dhe përfaqësues të qeverive.
Sipas WTTC, pavarësisht pasigurive gjeopolitike dhe ekonomike, sektori global i udhëtimeve dhe turizmit pritet të zgjerohet me 2.5% gjatë këtij viti, duke tejkaluar ritmet e rritjes së ekonomisë botërore.
Evropa parashikohet të ketë një ecuri më të mirë se mesatarja globale. Shpenzimet e vizitorëve ndërkombëtarë pritet të rriten me 5.8%, ndërsa shpenzimet për udhëtime turistike dhe ato për qëllime biznesi parashikohen të zgjerohen përkatësisht me 3.1% dhe 4.2%.
Turizmi mbetet një nga sektorët më të rëndësishëm për ekonominë evropiane, duke mbështetur rreth një në dhjetë vende pune në rajon.
Në nivel global, kontributi i sektorit në ekonomi arriti në 11.6 trilionë dollarë gjatë vitit 2025, ose 9.8% të Prodhimit të Brendshëm Bruto botëror. Industria mbështeti 366 milionë vende pune, afërsisht një në çdo nëntë vende pune në botë, shkruan Monitor, transmeton albinfo.ch.
Gloria Guevara, Presidente dhe Drejtore Ekzekutive e WTTC-së, theksoi se industria ka treguar qëndrueshmëri të lartë përballë sfidave gjeopolitike, por potenciali i saj i ardhshëm do të varet nga politikat qeveritare.
Sipas saj, qeveritë duhet të krijojnë kushte që lehtësojnë udhëtimet, përmirësojnë lidhjet ndërmjet destinacioneve, zhvillojnë kapitalin njerëzor dhe mbështesin rritjen e qëndrueshme.
Malta, ndër ekonomitë me rritjen më të shpejtë të turizmit
Të dhënat e WTTC-së tregojnë se Malta është ndër vendet evropiane me performancën më të mirë në turizëm.
Në vitin 2025, kontributi i turizmit në PBB-në e vendit u rrit me 16.8%, norma më e lartë ndër ekonomitë evropiane, kundrejt mesatares prej 2.6% në Evropë.
Për vitin 2026, sektori parashikohet të kontribuojë me 4.9 miliardë dollarë në ekonominë malteze, ekuivalente me 16.9% të PBB-së, ndërsa mbështet më shumë se një në pesë vende pune.
Samiti Global i WTTC-së ka në qendër diskutimet mbi investimet, përmirësimin e lidhjeve të transportit, përdorimin e teknologjisë dhe inteligjencës artificiale, zhvillimin e fuqisë punëtore dhe konkurrueshmërinë e destinacioneve.
Një tjetër çështje kryesore është nevoja që rritja e turizmit të mos matet vetëm me numrin e vizitorëve, por edhe me vlerën ekonomike, sociale dhe mjedisore që krijon për komunitetet lokale.
