Duke siguruar frekuenca për telefoninë celulare në Shtetet e Bashkuara, Starlink ndërmerr një hap të ri dhe mund të shndërrohet në një konkurrent të drejtpërdrejtë të operatorëve tradicionalë. Megjithatë, në Zvicër, ku rrjetet janë tashmë shumë të zhvilluara, ky kërcënim duket më i kufizuar.
Starlink, rrjeti satelitor i SpaceX, kompanisë së Elon Musk, ka siguruar frekuenca celulare në brezin 800 megahertz në Shtetet e Bashkuara. Avantazhi i tyre: ato depërtojnë më mirë brenda ndërtesave.
Deri më tani, lidhjet celulare përmes satelitit funksiononin kryesisht në ambiente të jashtme, pasi sinjalet dobësoheshin ndjeshëm nga muret ose bimësia.
Pse kjo përbën shqetësim për sektorin e telefonisë celulare?
Kjo blerje ndryshon rrënjësisht rregullat e lojës. Deri më tani, Starlink mbështetej te partneritetet me operatorët e telekomunikacionit, siç është Salt në Zvicër. Në Shtetet Bashkuara, kompania tani mund të bëhet vetë një konkurrent i drejtpërdrejtë. Ky njoftim ndikoi negativisht edhe në vlerën e aksioneve të disa operatorëve të mëdhenj amerikanë.
Çfarë e bën tregun amerikan tërheqës për Elon Musk?
Gjeografia e Shteteve të Bashkuara i përshtatet veçanërisht mirë këtij modeli: territoret e gjera me popullsi të rrallë dhe rrugët e gjata janë të vështira dhe të kushtueshme për t’u mbuluar me antena konvencionale. Starlink zotëron tashmë një rrjet të gjerë satelitor. Duke shtuar një infrastrukturë tokësore, kompania mund t’i kombinojë të dyja teknologjitë dhe të ofrojë një mbulim celular shumë më të gjerë.
A duhet të shqetësohen operatorët zviceranë?
Situata në Zvicër është krejtësisht e ndryshme nga ajo në Shtetet e Bashkuara. Këtu, Starlink mund të shërbejë kryesisht për të mbuluar zonat e fundit që mbeten pa sinjal, veçanërisht në disa lugina të thella alpine ose për përdorim në zona malore, raporton RTS. Në pjesën tjetër të vendit, rrjetet celulare janë tashmë shumë të dendura, ndërsa mbulimi me teknologjinë 5G dhe fibra optike është tejet i zhvilluar.
Çfarë do ta vështirësonte hyrjen në tregun zviceran?
SpaceX nuk zotëron as frekuenca celulare dhe as një rrjet antenash në Zvicër. Kësaj i shtohen edhe kërkesat rregullatore. Frekuencat celulare shpërndahen përmes ankandeve dhe mbajtësit e koncesioneve duhet të përmbushin detyrimet për mbulimin e territorit. Për t’u bërë një operator i mirëfilltë, Starlink do të duhej të investonte në infrastrukturën e vet ose të lidhte marrëveshje me rrjetet ekzistuese, transmeton albinfo.ch.
A mund të bëhet Starlink një konkurrent serioz?
Ky skenar nuk përjashtohet plotësisht, por duket më pak i mundshëm sesa në Shtetet e Bashkuara. Tregu zviceran është i vogël, shumë i mbuluar dhe tashmë tejet konkurrues. Për Starlink, pra, mund të jetë më fitimprurëse të përqendrohet në zona të vështira për t’u arritur, në vend që të konkurrojë drejtpërdrejt me Swisscom, Sunrise ose Salt. Vendet e mëdha me territore të gjera, si Shtetet e Bashkuara, Kanadaja apo Australia, ofrojnë një potencial shumë më të madh.
