Krimet në Zvicër u rritën midis viteve 2022 dhe 2025, si sipas statistikave të policisë, ashtu edhe për sa u përket rasteve të padeklaruara.
Kjo rritje është veçanërisht e dukshme te veprat penale kundër pronës dhe te mashtrimet. Njëkohësisht, gjithnjë e më pak njerëz ndihen të sigurt. Ky është përfundimi i një studimi të publikuar sot nga Universiteti i Shkencave të Aplikuara i Cyrihut (ZHAW) dhe Universiteti i St. Gallenit (HSG).
Sipas studimit, të titulluar “Anketa mbi Krimin 2025” (Crime Survey 2025), një numër në rritje personash po bien viktima të krimit. Për pothuajse të gjitha veprat penale të shqyrtuara, një numër më i madh i të anketuarve raportuan se kanë qenë viktima, krahasuar me anketën e mëparshme të vitit 2022. Rritja më e theksuar lidhet me mashtrimet: gjatë një viti, 15,9% e të anketuarve janë prekur nga ky fenomen, krahasuar me 8,4% në vitin 2022.
Në të njëjtën kohë, shkalla e raportimit të krimeve ka mbetur pothuajse e pandryshuar. “Kjo do të thotë se rritja e krimeve të regjistruara nuk i atribuohet, në radhë të parë, një gatishmërie më të madhe për të denoncuar veprat penale,” thotë Dirk Baier, bashkëdrejtues i projektit “Anketa mbi Krimin” dhe profesor në ZHAW.
Krimet seksuale përbëjnë një përjashtim nga trendi i përgjithshëm, pasi nuk është vërejtur ndonjë rritje në shkallën e viktimizimit për këto vepra penale.
Ndërkohë, ndjesia e pasigurisë përballë krimit është në rritje. Rreth 83,1% e kampionit, që përfshin 13.500 persona të moshës 16 deri në 80 vjeç, të cilët jetojnë në mbarë Zvicrën – ndihen mjaft ose shumë të sigurt në lagjen e tyre pasi errësohet; një shifër kjo më e ulët krahasuar me 87,6% në vitin 2022.
Është rritur përqindja e njerëzve që kanë pasur frikë se mund të bien viktima të një krimi në rrugë gjatë dymbëdhjetë muajve të fundit. Për më tepër, një numër më i madh i të anketuarve e konsiderojnë të pamjaftueshme praninë e policisë në hapësirat publike: 37,9%, krahasuar me 28,9% në vitin 2022, shkruan swissinfo. Megjithatë, besimi te policia mbetet i lartë, transmeton albinfo.ch.
Në përgjithësi, studiuesit nuk e konsiderojnë dramatike rënien e ndjesisë së sigurisë dhe frikën nga krimi. “Duhet ta marrim seriozisht këtë zhvillim, pa e dramatizuar atë së tepërmi. Pavarësisht rënies së ndjesisë së sigurisë, popullata vazhdon ta perceptojë Zvicrën si një vend të sigurt,” thotë Nora Markwalder, bashkëdrejtuese e projektit dhe profesoreshë në HSG.
Një raport plotësues shqyrton dhunën në familje. Në përgjithësi, përqindja e njerëzve që kanë përjetuar të paktën një formë të dhunës në familje gjatë një periudhe pesëvjeçare nuk ka ndryshuar ndjeshëm krahasuar me vitin 2022. Gratë mbeten dukshëm më të prekura sesa burrat: 5,4% e grave dhe 2,2% e burrave raportojnë përvoja të tilla.
“Fakti që gratë preken nga dhuna në familje në një shkallë dukshëm më të lartë se burrat, është i dukshëm jo vetëm nga statistikat zyrtare, por edhe nga rastet e padeklaruara,” vëren Baier. “Prandaj, gjetjet theksojnë rëndësinë e masave të mëtejshme parandaluese kundër dhunës ndaj grave.” Ndër format specifike të dhunës që janë shqyrtuar, vetëm krimet e urrejtjes brenda familjes shfaqin një rritje statistikisht të konsiderueshme krahasuar me vitin 2022.
