Bashkëpunimi ekonomik dhe shkëmbimi i përvojave në fushën e teknologjisë ishin në fokus të pjesëmarrjes së Odës Nordike të Tregtisë në Kosovë (NCC) në edicionin e sivjetmë të KosICT 2026, transmeton tutje albinfo.ch.
NCC mori pjesë në këtë ngjarje së bashku me Ambasadën e Finlandës në Kosovë, duke synuar forcimin e marrëdhënieve ndërmjet bizneseve nordike dhe ekosistemit gjithnjë në zhvillim të teknologjisë në Kosovë.
KosICT mbledh liderë të industrisë së teknologjisë, inovatorë dhe përfaqësues të bizneseve, duke krijuar mundësi për rrjetëzim, shkëmbim njohurish dhe bashkëpunim ndërmjet vendeve.
Një nga pjesët e veçanta të këtij edicioni ishte pjesëmarrja e Linda Liukas, autore dhe ilustruese finlandeze, si dhe krijuese e projektit “Hello Ruby”, e cila mbajti një fjalim kryesor.
Përmes punës së saj për ta bërë teknologjinë më të kuptueshme dhe më të qasshme, Liukas promovon rëndësinë e edukimit digjital, kreativitetit dhe inovacionit, veçanërisht te gjeneratat e reja.
Sipas Odës Nordike të Tregtisë në Kosovë, partneritetet ndërmjet Kosovës dhe vendeve nordike krijojnë mundësi konkrete për bizneset që të shkëmbejnë ekspertizë, të eksplorojnë tregje të reja dhe të ndërtojnë marrëdhënie të qëndrueshme.
NCC ka falënderuar Ambasadën e Finlandës për bashkëpunimin, si dhe organizatorët e KosICT për kontributin në bashkimin e komunitetit të teknologjisë.
Përmes nismave të tilla, synohet të krijohen ura bashkëpunimi që mund të nxisin zhvillimin e sektorit digjital dhe të hapin mundësi të reja për bizneset në Kosovë dhe vendet nordike./Albinfo.ch
