Bashkimi Evropian ka përshëndetur miratimin e Ligjit për Parandalimin e Pastrimit të Parave dhe Luftimin e Financimit të Terrorizmit në Kuvendin e Kosovës, duke e cilësuar këtë vendim si një hap përpara në procesin e integrimit të vendit në Zonën e Vetme të Pagesave në Euro (SEPA), përcjell albinfo.ch.
Ambasadori i BE-së në Kosovë, Dirk Schuebel, ka vlerësuar se miratimi i ligjit përbën një zhvillim të rëndësishëm, i cili kontribuon në afrimin gradual të Kosovës me Tregun e Përbashkët të Bashkimit Evropian.
“Ky është një lajm i mirë! Pasi Kosova të anëtarësohet në SEPA, pagesat dhe transfertat e parave drejt dhe nga vendet e zonës SEPA do të bëhen më të lehta, më të shpejta dhe më të lira, duke u kursyer bizneseve dhe qytetarëve kohë dhe para”, ka deklaruar Schuebel.
Kuvendi i Kosovës e miratoi ligjin të enjten, në shqyrtim të dytë. Ky vendim është pjesë e hapave që Kosova duhet të ndërmarrë për të përmbushur kërkesat në procesin drejt anëtarësimit në SEPA.
Anëtarësimi në këtë zonë pritet të lehtësojë transfertat bankare në euro ndërmjet Kosovës dhe vendeve pjesëmarrëse, duke ulur kostot dhe kohën e nevojshme për kryerjen e pagesave për qytetarët dhe bizneset./Albinfo.ch
