Aktualisht, në aeroportin e Cyrihut ka mungesë të karburantit për avionë, gjë që ka shtyrë qeverinë zvicerane të ndërhyjë për të ndihmuar aeroportin.
Shkaku i vështirësive të aeroportit me karburantin nuk është aq mungesa e vetë lëndës djegëse, sa çrregullimet në logjistikën e transportit dhe të furnizimit.
Karburanti mbërrin në Cyrih përmes Gjermanisë, ose nëpërmjet lumit Rajn, ose me hekurudhë; të dyja këto rrugë po përballen me probleme kapaciteti dhe vonesa.
Gjatë thatësirës së zgjatur që preku një pjesë të madhe të Evropës në verë, niveli i ujit në lumin Rajn ra në nivele historikisht të ulëta dhe ende nuk është rikthyer plotësisht në normalitet.
Kjo situatë ka penguar furnizimin me karburant, pasi anijet cisternë dhe maunet janë të detyruara të lundrojnë me ngarkesa më të vogla për të mundur të kalojnë nëpër pjesët e cekëta të lumit.
Për të lehtësuar këtë rrugë, një pjesë e karburantit transportohet edhe me hekurudhë, por edhe ky sektor ka hasur në një sërë vështirësish.
Qeveria vjen në ndihmë
“Për shkak të niveleve të ulëta të ujit në Rajn, transporti i mallrave të tjera është zhvendosur drejt rrjetit hekurudhor, i cili është tashmë tejet i mbingarkuar; kjo e bën të pamundur kompensimin në kohë të dërgesave të munguara,” deklaroi Zyra Federale për Furnizimin Ekonomik Kombëtar (FONES).
Gjithashtu, “anulimet dhe vonesat e konsiderueshme në transportin hekurudhor të mallrave veçanërisht në linjat që vijnë nga Gjermania, po pengojnë furnizimin me karburant për avionë në Aeroportin e Cyrihut.”
Për të shmangur ndërprerjet në operacionet e fluturimit në aeroport, FONES ka “autorizuar përkohësisht tërheqjen e sasive të kufizuara të karburantit nga rezervat e saj të detyrueshme”, të cilat mbulojnë 4,5 muaj (rreth 135 ditë) të konsumit normal.
Konkretisht, lejohet tërheqja e deri në 30 000 metra kub karburant për një periudhë të kufizuar, midis 15 tetorit dhe 1 nëntorit 2026, bëri të ditur FONES.
Dhe, nëse pyesni veten, FONES nuk e ruan fizikisht karburantin në një magazinë të vetme; përkundrazi, ajo lidh kontrata me rreth 280 importues privatë nafte dhe rafineri, të cilat e ruajnë dhe e plotësojnë rregullisht këtë rezervë në emër të qeverisë, raporton thelocal, transmeton albinfo.ch.
Pse Aeroporti i Cyrihut përballet me probleme furnizimi, ndërsa aeroportet e tjera ndërkombëtare të Zvicrës, ai i Gjenevës dhe i Bazelit, jo?
Kjo ndodh sepse ato përdorin kanale të ndryshme furnizimi. Zyrihu varet shumë nga transporti lumor dhe hekurudhor përmes Gjermanisë, ndërsa dy aeroportet e tjera jo.
Ato përdorin zinxhirë furnizimi dhe rrjete transporti rajonale që e shmangin korridorin e tranzitit verior dhe duket se janë shumë më të besueshme.
A do të përballet Zvicra me mungesa të karburantit?
FONES pranon se “furnizimi i Zvicrës me benzinë, naftë dhe naftë për ngrohje është përkeqësuar”, megjithëse thekson se, në përgjithësi, “ai mbetet i sigurt”.
