Pas një sulmi kibernetik ndaj një ofruesi të jashtëm softuerësh, u vodhën gjithashtu të dhëna personale nga fondi i pensioneve i Cyrihut dhe ndoshta edhe nga ai i “Swiss Post” (Shërbimi Postar Zviceran).
Bashkia e Cyrihut njoftoi se fondet e pensioneve dhe pagesat vazhdojnë të funksionojnë normalisht. Ditët e fundit, edhe fonde të tjera pensionesh në Zvicër kanë rënë pre e sulmeve kibernetike.
Sipas autoriteteve të Cyrihut, sulmi ndodhi në fund të shtatorit. Të dhënat e fondit të pensioneve ishin transferuar më parë, në kuadër të kalimit në një sistem të ri menaxhimi. Fondi i pensioneve ka paraqitur një kallëzim penal.
Fondi po përpiqet të përcaktojë saktësisht se çfarë informacioni është vjedhur dhe sa persona janë prekur, shkruan swissinfo. Në skenarin më të keq, shkelja e të dhënave përfshin detaje personale kontakti (emri, adresa, e-maili, numri i telefonit), numrin e sigurimeve shoqërore, gjendjen civile, informacione mbi partnerët, numrin IBAN, si dhe të dhëna që lidhen me pensionin, siç janë të ardhurat e siguruara dhe asetet, transmeton albinfo.ch.
Sistemi administrativ që përdoret nga fondet për menaxhimin e aseteve dhe pagesën e pensioneve, nuk besohet të jetë prekur nga sulmi.
Edhe fondi i pensioneve i “Swiss Post” njoftoi këtë mbrëmje, përmes një deklarate për shtyp, se ishte prekur nga sulmi ndaj ofruesit të softuerit. Ende nuk është e qartë nëse të dhënat e përfituesve janë komprometuar.
Sipas deklaratës së “Swiss Post”, asetet e pensioneve dhe përfitimet pensionale nuk janë në rrezik. Megjithatë, të dhëna personale si emri, adresa, data e lindjes, numri i sigurimeve shoqërore, detajet e kontaktit, adresa e e-mailit dhe informacione të tjera lidhur me pensionin mund të jenë prekur nga ky sulm kibernetik.
Sulmi kibernetik ka prekur edhe fonde të tjera pensionesh. Javën e kaluar u bë e ditur se ishin vjedhur të dhëna edhe nga Fondi i Pensioneve i Bernës, si dhe nga Fondi i Sigurimeve për Mësuesit në Bernë.
