Hekurudhat Federale Zvicerane (SBB) regjistruan 97 raste të deformimit dhe dëmtimit të shinave gjatë verës së vitit 2026, pothuajse katër herë më shumë se një vit më parë, raporton RTS, transmeton albinfo.ch.
Sipas SBB-së, temperaturat e larta shkaktuan dëmtime në infrastrukturën hekurudhore, por rastet e regjistruara nuk ndikuan në sigurinë e qarkullimit të trenave.
Për t’u përballur me valët e të nxehtit, kompania ka krijuar një grup pune që do të shqyrtojë masa shtesë, përfshirë përdorimin e traversave prej betoni dhe përshtatjen e proceseve të saldimit të shinave.
SBB ka testuar gjithashtu ngjyrosjen e shinave me të bardhë për të ulur temperaturën e tyre. Efekti fillestar ishte një ftohje mesatare prej 4,5 gradësh Celsius, por pas dy vjetësh u përgjysmua për shkak të ndotjes.
Kompania po shqyrton nëse kjo metodë mund të përdoret në raste të veçanta, ndërsa thekson se eliminimi i plotë i rrezikut nga temperaturat ekstreme nuk është i mundur.
