Policia e Shtetit në Shqipëri ka reaguar pas incidenteve të ndodhura gjatë protestës, duke bërë të ditur se zyrtarët policorë janë sulmuar me bomba molotov nga një grup protestuesish të maskuar.
Sipas policisë, personat e dyshuar, në përpjekje për t’iu shmangur arrestimit, janë futur në hapësirat e jashtme të selisë së Partisë Demokratike, ku kanë vazhduar sulmet ndaj forcave të rendit.
Në njoftimin zyrtar thuhet se policia ka përdorur gaz lotsjellës si kundërpërgjigje ndaj sulmeve me molotovë nga ana e protestuesve.
Gjithashtu, Policia e Shtetit ka hedhur poshtë pretendimet e tjera lidhur me ngjarjen, duke i cilësuar ato si të pavërteta dhe dashakeqe. Sipas saj, këto pretendime synojnë të shtrembërojnë të vërtetën rreth zhvillimeve gjatë protestës.
