Gazeta zvicerane Blick ka përfshirë Shqipërinë në mesin e vendeve evropiane ku po zhvillohen protesta të të rinjve, krahas Francës, Belgjikës, Italisë dhe Spanjës, përcjell albinfo.ch.
Sipas artikullit, pakënaqësitë lidhen me problemet në arsim, vështirësitë ekonomike, rritjen e kostos së jetesës dhe korrupsionin.
Duke iu referuar Shqipërisë, Blick shkruan për protestat në Tiranë, të cilat, sipas medias, janë shoqëruar me episode dhune, përfshirë hedhjen e gurëve drejt rezidencës zyrtare të kryeministrit Edi Rama dhe dëmtimin e institucioneve publike.
Në Francë, protestat lidhen me kushtet në shkolla dhe rritjen e çmimeve të energjisë, ndërsa në Belgjikë pakënaqësitë përqendrohen te shkurtimet në arsim dhe ngarkesa e mësuesve. Në Itali përmenden problemet në shkolla dhe shtrenjtimi i jetesës.
Ndërkaq, në Spanjë, kriza e strehimit, rritja e qirave dhe mungesa e perspektivave për të rinjtë paraqiten si ndër arsyet kryesore të protestave.
Sipas raportimit të gazetës zvicerane, elementi i përbashkët i këtyre lëvizjeve është pakënaqësia e të rinjve për çështje që ndikojnë drejtpërdrejt në arsimimin, mirëqenien dhe të ardhmen e tyre. Megjithatë, në disa raste, demonstratat janë shoqëruar me përplasje dhe dëmtime të pronës publike e private./Albinfo.ch
