Nxënësit e Shkollës Shqipe në Düsseldorf kanë marrë pjesë me një program artistik në orën letrare “Shenjtorja”, e organizuar më 18 tetor 2026, në nderim të Shën Nënë Terezës dhe dhjetëvjetorit të shenjtërimit të saj. Aktiviteti mblodhi bashkë krijues shqiptarë dhe përfaqësues të komunitetit, shkruan albinfo.ch.
Veprimtaria u organizua nga Lidhja e Shkrimtarëve, Artistëve dhe Krijuesve Shqiptarë në Gjermani, në bashkëpunim me Misionin Katolik Shqiptar në Düsseldorf.
Përmes paraqitjes së tyre artistike, nxënësit kontribuuan në këtë ngjarje kushtuar figurës së Nënë Terezës, e cila mbetet një simbol i humanizmit, përkushtimit ndaj njerëzve në nevojë dhe krenarisë shqiptare në botë.
Pjesëmarrja e fëmijëve në aktivitete të tilla dëshmon rëndësinë e shkollave shqipe në diasporë, jo vetëm për mësimin e gjuhës amtare, por edhe për përcjelljen te brezat e rinj të traditave, vlerave kulturore dhe figurave të rëndësishme të historisë shqiptare.
Përfaqësuesit e shkollës kanë shprehur krenarinë për nxënësit dhe kontributin e tyre në ruajtjen dhe promovimin e identitetit shqiptar në Gjermani./Albinfo.ch
