Situata politike dhe e sigurisë në Kosovë do të jetë në qendër të diskutimeve të sotme në Këshillin e Sigurimit të Organizatës së Kombeve të Bashkuara (OKB), ku pritet të shqyrtohet raporti i fundit i Sekretarit të Përgjithshëm për zhvillimet në vend, përcjell albinfo.ch.
Mbledhja pritet të nisë në orën 21:00, sipas kohës lokale në Kosovë. Raportin do ta prezantojë shefi i UNMIK-ut, Peter Due, i cili do t’i informojë anëtarët e Këshillit për zhvillimet gjatë periudhës 16 mars – 15 shtator 2026.
Sipas raportit, gjendja e përgjithshme e sigurisë ka mbetur e qëndrueshme, megjithëse vazhdojnë sfidat në funksionimin e institucioneve dhe përparimi në zbatimin e marrëveshjeve të dialogut ndërmjet Kosovës dhe Serbisë vlerësohet i kufizuar.
Konjufca përfaqëson sot Kosovën në Këshillin e Sigurimit të OKB-së
Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, do ta përfaqësojë Kosovën sot, më 20 tetor 2026, në mbledhjen e Këshillit të Sigurimit të OKB-së, ku do të shqyrtohet raporti i fundit i Sekretarit të Përgjithshëm për zhvillimet në Kosovë. Sipas MPJD-së, mbledhja do të nisë në orën 21:00 sipas kohës së Kosovës.
Veriu dhe dialogu me Serbinë në qendër të vëmendjes
Një nga temat kryesore pritet të jetë situata në veri të Kosovës. Raporti e cilëson atë të qetë, por të brishtë, duke vënë në pah mosmarrëveshjet ndërmjet autoriteteve qendrore dhe atyre lokale.
Anëtarët e Këshillit pritet të diskutojnë gjithashtu për dialogun Kosovë–Serbi dhe zbatimin e Marrëveshjes së Ohrit, si dhe për rikthimin e gjyqtarëve dhe prokurorëve serbë në sistemin e drejtësisë së Kosovës.
Në fokus do të jetë edhe çështja e përgjegjësisë për sulmin në Banjskë, të kryer në shtator të vitit 2023, i cili mbetet një prej zhvillimeve më të rëndësishme në raport me sigurinë në veri të vendit.
1.579 persona të zhdukur gjatë luftës
Një tjetër çështje me rëndësi të veçantë është zbardhja e fatit të personave të zhdukur gjatë luftës në Kosovë. Sipas raportit të OKB-së, deri më 15 shtator 2026, ende nuk dihej fati i 1.579 personave.
Kjo çështje vazhdon të përbëjë një nga sfidat më të ndjeshme humanitare dhe politike në marrëdhëniet ndërmjet Kosovës dhe Serbisë.
Zhvillimet politike dhe e ardhmja e UNMIK-ut
Diskutimet do të përfshijnë edhe zhvillimet e brendshme politike në Kosovë, përfshirë formimin e qeverisë në shtator dhe zgjedhjen e Justina Pula-Shirokës presidente më 7 tetor.
Në të njëjtën kohë, pritet të rihapet debati për të ardhmen e UNMIK-ut, pasi shtetet anëtare të OKB-së vazhdojnë të kenë qëndrime të ndryshme lidhur me rolin dhe mandatin e këtij misioni në Kosovë.
Në mbledhje pritet të marrin pjesë edhe përfaqësues të Kosovës, Serbisë dhe Bashkimit Evropian, ndërsa diskutimet do të shërbejnë si një mundësi për të paraqitur qëndrimet e palëve për zhvillimet politike dhe të sigurisë në vend./Albinfo.ch
