Ministri i Jashtëm i Kosovës, Glauk Konjufca, i është përgjigjur deklaratave të homologut të tij serb, Marko Gjuriq, në seancën e Këshillit të Sigurimit të Organizatës së Kombeve të Bashkuara për Kosovën, duke i cilësuar pretendimet e Serbisë për gjendjen e serbëve në vend si propagandë kundër Kosovës, përcjell albinfo.ch.
Në fjalën e tij, Gjuriq kishte përmendur disa raste përmes të cilave, sipas tij, serbët në Kosovë përballen me pasiguri. Në kundërpërgjigjen e tij, Konjufca kritikoi Beogradin për mënyrën se si i paraqet zhvillimet në Kosovë dhe rikujtoi krimet e kryera nga forcat serbe gjatë luftës së viteve 1998–1999.
Konjufca theksoi se Kosova është shtet multietnik dhe laik, duke vënë në pah bashkëjetesën ndërmjet komuniteteve dhe përkatësive të ndryshme fetare.
Ai kundërshtoi pretendimet për ekstremizëm fetar në Kosovë, duke përmendur edhe zgjedhjen e presidentes së vendit, e cila i përket besimit katolik.
Ministri kosovar akuzoi Serbinë se e shfrytëzon fenë për qëllime nacionaliste dhe për nxitjen e ndarjeve etnike. Në këtë kontekst, ai përmendi vrasjet e civilëve shqiptarë gjatë luftës dhe masakrën e Mejës, duke e cilësuar atë si një nga krimet më të rënda të kryera në Kosovë në vitin 1999.
Konjufca tha se institucionet e Kosovës veprojnë në bazë të ligjit dhe procedurave, pavarësisht përkatësisë etnike të personave ndaj të cilëve ndërmerren masa. Ai theksoi se rastet e krimeve të luftës, spiunazhit dhe uzurpimit të pronës trajtohen përmes hetimeve dhe provave përkatëse.
Duke folur për masat e ndërmarra në zonën e liqenit të Ujmanit, ministri deklaroi se ato synojnë mbrojtjen e pronës publike dhe zbatimin e ligjit. Sipas tij, 17 objekte të paligjshme janë rrënuar në zonën e Ujmanit, ndërsa pesë të tjera në zonën e liqenit të Radoniqit.
Ai kundërshtoi gjithashtu pretendimet se veprimet e institucioneve të Kosovës synojnë frikësimin dhe largimin e serbëve nga vendi.
“Por, Serbia vazhdimisht është përpjekur për të portretizuar aktivitetet tona ligjzbatuese si frikësim me qëllim që t’i nxjerrë serbët jashtë Kosovës. Më besoni, kjo është një propagandë e pastër”, deklaroi Konjufca.
Sa u përket gjyqtarëve dhe prokurorëve serbë, ai tha se vlerësimi i tyre duhet të bëhet në përputhje me kuadrin ligjor dhe përgjegjësitë institucionale. Konjufca rikujtoi se në vitin 2022, gjyqtarë dhe prokurorë serbë u larguan nga institucionet e drejtësisë së Kosovës, duke e cilësuar këtë veprim si pasojë të direktivave nga Beogradi.
Në fund të fjalës së tij, Konjufca e orientoi kritikën drejt marrëdhënieve të Gjuriqit me Milan Radoiçiqin, ish-udhëheqësin e grupit të armatosur që kreu sulmin në Banjskë më 24 shtator 2023.
Duke iu referuar fotografive të Gjuriqit me Radoiçiqin, Konjufca vuri në pikëpyetje angazhimin e Serbisë për integrimin evropian, duke përmendur faktin se Radoiçiqi kërkohet nga Interpoli.
Ai e përfundoi fjalën duke theksuar se pretendimet për të ardhmen evropiane të Serbisë duhet të shoqërohen me veprime konkrete dhe qëndrime në përputhje me sundimin e ligjit dhe përgjegjësinë institucionale./Albinfo.ch
