Mbretëria e Bashkuar i ka bërë thirrje Serbisë që përgjegjësit për sulmin e armatosur në Banjskë të Zveçanit, përfshirë Milan Radoiçiqin, të përballen me drejtësinë.
Kërkesa u paraqit nga përfaqësuesja britanike në Organizatën e Kombeve të Bashkuara (OKB), Jennifer MacNaughtan, gjatë adresimit në Këshillin e Sigurimit, ku ajo rikujtoi sulmin e 24 shtatorit 2023, në të cilin u vra rreshteri i Policisë së Kosovës, Afrim Bunjaku.
“Vazhdojmë t’i bëjmë thirrje Serbisë që ata që janë përgjegjës të sillen para drejtësisë”, deklaroi MacNaughtan, duke përmendur në mënyrë të veçantë Milan Radoiçiqin.
Përfaqësuesja britanike u ndal edhe te procesi i normalizimit të marrëdhënieve ndërmjet Kosovës dhe Serbisë, të cilin e cilësoi si të rëndësishëm për stabilitetin afatgjatë dhe perspektivën evropiane të të dyja vendeve.
Ajo u bëri thirrje Prishtinës dhe Beogradit që të zbatojnë marrëveshjet ekzistuese dhe të angazhohen në mënyrë konstruktive në dialogun e ndërmjetësuar nga Bashkimi Evropian.
Një tjetër çështje e ngritur nga MacNaughtan ishte fati i personave të zhdukur gjatë luftës në Kosovë. Ajo kërkoi nga Serbia qasje në arkivat dhe dokumentacionin përkatës, me qëllim të përparimit në zbardhjen e fatit të personave që ende konsiderohen të zhdukur.
Në fund të adresimit, Mbretëria e Bashkuar rikonfirmoi mbështetjen për Kosovën dhe kërkoi rishikimin e rolit dhe financimit të Misionit të Kombeve të Bashkuara në Kosovë (UNMIK), në përputhje me zhvillimet dhe rrethanat aktuale në vend.
