Në Vjenë është paralajmëruar një protestë masive kundër shkurtimeve të planifikuara në financimin e universiteteve.
Sipas organizatorëve, sot (E enjte) pritet të mblidhen në rrugët e Vjenës rreth 20 mijë persona, shkruajnë mediat austriake, përcjell albinfo.at.
Klubi Austriak i Automobilave, Motoçikletave dhe Turizmit (ÖAMTC) ka paralajmëruar për bllokime masive trafiku dhe vonesa që zgjasin me orë të tëra. Apelohet që të shmangën lëvizjet me makina, veçanërisht në qendër të kryeqytetit. “Lëreni makinën tuaj në shtëpi nëse është e mundur, udhëtoni me metro (U-bahn)”, thuhet në njoftimin e ÖAMTC-së.
Nën moton “Alarmstufe Rot – Unisretten” (Alarm i Kuq – #ShpëtoniUniversitetet), mijëra studentë, pedagogë dhe staf universitar do të dalin në rrugë për të protestuar kundër shkurtimeve të planifikuara në sektorin e arsimit, shkruan albinfo.at.
Arsyeja pse mijëra njerëz po dalin në rrugë
Universitetet e Austrisë po përballen me shkurtime drastike – dhe rezistenca ndaj masave shtrënguese të qeverisë federale po rritet. Për periudhën e financimit nga viti 2028 deri në vitin 2030, janë ndarë pak më pak se 15.9 miliardë euro, ndërsa universitetet kishin kërkuar rreth 18 miliardë euro. E përshtatur me inflacionin, kjo përfaqëson një ulje prej afërsisht dhjetë për qind, sipas rektorëve të universiteteve. Pasojat mund të jenë të rënda: deri në 6,800 vende pune janë në rrezik, programet e studimit mund të tkurren dhe projektet kërkimore mund të vihen nën presion.
Shqetësime për trazirat
Paralajmërimet për dhunë të mundshme tashmë po qarkullojnë në mediat sociale. Disa përdorues madje po bëjnë krahasime me protestat në Francë, Shqipëri, Itali dhe vende tjera në evropë, dhe kanë frikë nga djegia e makinave ose trazirat.
Në anën tjetër policia austriake ka theksuar se, janë bërë të gjitha përgatitjet për secilin skenar të mundshëm.
