Një nismë e re në shërbim të gjuhës shqipe dhe brezave të rinj në diasporë ka nisur me hapjen e Klubit të Leximit në Gjuhën Shqipe, pjesë e projektit “Biblioteka Shqip në Diasporë”. Takimi i parë u mbajt të shtunën, më 17 tetor, duke mbledhur fëmijë e të rinj rreth librave, tregimeve dhe aktiviteteve krijuese, transmeton albinfo.ch.
Nisma synon të krijojë një mjedis ku fëmijët dhe të rinjtë shqiptarë, të moshës 5 deri në 25 vjeç, mund të lexojnë në gjuhën shqipe, të zgjerojnë fjalorin dhe të zhvillojnë aftësitë e tyre gjuhësore.
Takimi i parë u karakterizua nga kureshtja dhe pjesëmarrja aktive e fëmijëve. Ata dëgjuan me vëmendje tregimet e lexuara, parashtruan pyetje dhe u përfshinë në diskutime, ndërsa pas leximit morën pjesë edhe në lojëra argëtuese dhe aktivitete krijuese.
Përtej argëtimit, leximi luan një rol të rëndësishëm në zhvillimin e imagjinatës, kreativitetit, përqendrimit dhe të menduarit kritik. Ai ndihmon gjithashtu në pasurimin e fjalorit, përmirësimin e komunikimit dhe krijimin e një lidhjeje më të afërt me librin që në moshë të hershme.
Për fëmijët shqiptarë që rriten jashtë vendlindjes, iniciativa të tilla kanë një rëndësi të veçantë. Përmes leximit në gjuhën amtare, ata jo vetëm që përmirësojnë njohuritë e tyre në shqip, por edhe njihen më nga afër me kulturën, traditat dhe trashëgiminë shqiptare.
“Biblioteka Shqip në Diasporë” synon që librin ta kthejë në një pikë takimi mes brezave dhe në një mjet për ruajtjen e identitetit kombëtar. Çdo tregim i lexuar dhe çdo fjalë e mësuar në shqip përbën një hap drejt forcimit të lidhjes së fëmijëve me gjuhën e tyre amtare./Albinfo.ch
