Operatori i telekomunikacionit Sunrise do të shkurtojë 358 vende pune në kuadër të riorganizimit të veprimtarisë së tij në Zvicër.
Kompania fillimisht kishte parashikuar shkurtimin e deri në 450 vendeve të punës. Numri u zvogëlua pas konsultimeve dhe propozimeve të përfaqësuesve të punonjësve dhe sindikatës Syndicom.
Për punonjësit e prekur do të zbatohet një plan social. Sunrise njoftoi se gjatë konsultimeve janë përmirësuar veçanërisht masat mbështetëse për punonjësit më të moshuar. Në disa sektorë do të ofrohet edhe mundësia e largimit vullnetar sipas kushteve të këtij plani.
Kompania e arsyeton vendimin me nevojën për rritjen e konkurrueshmërisë dhe efikasitetit. Paralelisht, po shqyrton kontratat me furnitorët dhe shpenzimet e tjera të jashtme. Syndicom e vlerësoi pozitivisht rezultatin e konsultimeve, duke shprehur shpresën se ky do të jetë shkurtimi i fundit.
Në fillim të vitit, Sunrise kishte njoftuar heqjen e 147 vendeve të tjera të punës, proces që përfundoi gjatë verës. Me vendimin e fundit, numri i vendeve të shkurtuara këtë vit kalon 500, përcjell albinfo.ch.
