Një ekip i Forcës së Sigurisë së Kosovës ka përfunduar për herë të parë trajnimin për zhvillimin e liderëve të rinj ushtarakë në Kroaci, në kuadër të bashkëpunimit dypalësh ndërmjet dy vendeve.
Sipas njoftimit të publikuar nga FSK-ja, trajnimi u organizua në Qendrën “Marko Babić” të Ushtrisë Kroate dhe u përmbyll me një marshim taktik prej 88 kilometrash, nga Udbina deri te Kalaja e Kninit.
Marshimi vuri në sprovë qëndrueshmërinë fizike dhe mendore të pjesëmarrësve, aftësitë udhëheqëse, disiplinën dhe vendimmarrjen në rrethana sfiduese. Ai kishte edhe domethënie simbolike, duke nderuar historinë dhe sakrificën e popullit kroat gjatë Luftës Atdhetare.
Në trajnim morën pjesë ushtarakë nga Kroacia, Kosova, Sllovenia, Shqipëria, Maqedonia e Veriut dhe Mali i Zi. FSK-ja e vlerësoi pjesëmarrjen si një mundësi të rëndësishme për shkëmbimin e përvojave, avancimin profesional dhe forcimin e bashkëpunimit ushtarak ndërmjet Kosovës dhe Kroacisë.
Në njoftim, FSK-ja ritheksoi përkushtimin për zhvillimin e lidershipit ushtarak, ngritjen e profesionalizmit dhe zgjerimin e bashkëpunimit me partnerët ndërkombëtarë, në funksion të përmbushjes së misionit të saj, përcjell albinfo.ch.
