Pas njoftimit për dorëheqjen e ministrit të Ekonomisë, Guy Parmelin, gara brenda Partisë Popullore Zvicerane (SVP) për vendin e tij në Qeverinë Federale po merr përmasa të reja. Brenda vetëm 24 orëve, pesë kandidatë kanë shprehur interesim për të hyrë në garë, transmeton albinfo.ch.
Deri më tani, kandidaturën e kanë konfirmuar Céline Amaudruz dhe Rémy Wyssmann, ndërsa emra të tjerë po përmenden në kuadër të procesit të përzgjedhjes.
Një nga çështjet që po tërheq vëmendje është mundësia që SVP të propozojë për herë të parë një grua për këtë post në Qeverinë Federale, pasi deri më tani kjo parti nuk ka pasur asnjë grua në përbërjen e qeverisë.
Sipas afatit të përcaktuar, seksionet kantonale të partisë duhet t’i paraqesin propozimet e tyre komisionit përzgjedhës deri më 23 tetor. Më pas do të vazhdojë procesi për përcaktimin e kandidaturave për pasardhësin e Parmelinit./Albinfo.ch
