Prokuroria dyshon se të ndaluarit kanë vepruar përmes qendrave ilegale të thirrjeve në Prishtinë, duke joshur qytetarët suedezë me oferta të rreme investimi në kriptovaluta. Dy të dyshuarit akuzohen gjithashtu për sulm ndaj zyrtarëve policorë, transmeton albinfo.ch.
Nëntë persona janë ndaluar për 48 orë nën dyshimin për mashtrim përmes qendrave ilegale të thirrjeve (Call Center), të cilat dyshohet se janë përdorur për të mashtruar shtetas suedezë me oferta të rreme investimi në kriptovaluta.
Lajmi është bërë i ditur nga Prokuroria Themelore në Ferizaj, e cila ka njoftuar se ndalimi është bërë me vendim të Prokurorit të Shtetit, nën dyshimin për kryerjen e veprës penale “Mashtrimi”.
Sipas Prokurorisë, rasti dyshohet se ka ndodhur gjatë vitit 2026, në disa lokacione të ndryshme në Prishtinë, ku të dyshuarit, duke vepruar si grup, pretendohet se kanë paraqitur fakte të rreme për të përfituar në mënyrë të kundërligjshme nga pasuria e personave të tjerë.
Viktimat e dyshuara të mashtrimit janë shtetas suedezë, të cilët pretendohet se janë nxitur të investojnë para në kriptovaluta, përfshirë Bitcoin-in, përmes ofertave të paraqitura nga këto qendra thirrjesh.
Pas investimit, sipas Prokurorisë, mjetet financiare janë transferuar në llogari të tjera të panjohura, duke u shkaktuar të dëmtuarve dëme të konsiderueshme materiale.
Gjatë aksionit, dy nga të dyshuarit dyshohet se kanë sulmuar zyrtarët policorë gjatë kryerjes së detyrave zyrtare. Për këtë arsye, ata dyshohen edhe për veprën penale “Sulmi ndaj personit zyrtar”.
Prokuroria ka bërë të ditur se nëntë personat e ndaluar janë me inicialet P.R., A.P., F.Z., D.H., B.E., T.S., D.H., R.H. dhe D.M.
Hetimet për rastin po vazhdojnë, ndërsa të dyshuarit konsiderohen të pafajshëm derisa fajësia e tyre të vërtetohet me vendim përfundimtar të gjykatës./Albinfo.ch
