Zvicra dhe Kosova synojnë të thellojnë bashkëpunimin në fushën e shëndetësisë, me fokus në përmirësimin e cilësisë së shërbimeve dhe lehtësimin e qasjes së qytetarëve në kujdes shëndetësor, transmeton albinfo.ch.
Ambasadorja zvicerane në Kosovë, Anne-Lise Cattin Hennin, është takuar me ministrin e Shëndetësisë, Arben Vitia, me të cilin ka diskutuar për rezultatet e programeve shëndetësore të mbështetura nga Zvicra.
Vëmendje e veçantë iu kushtua përparimit në kujdesin shëndetësor parësor dhe atë spitalor, si dhe nevojës për forcimin e institucioneve dhe zbatimin e praktikave të mira.
Të dyja palët rikonfirmuan përkushtimin për të vazhduar bashkëpunimin, me synimin që përmirësimet në sistemin shëndetësor të jenë të qëndrueshme dhe të sjellin përfitime konkrete për qytetarët e Kosovës./Albinfo.ch
