Një shtetas gjerman është arrestuar në Kosovë në lidhje me rastin e rreth një milion eurove të padeklaruara, të zbuluara në pikën kufitare në Merdarë në shkurt të këtij viti, transmeton albinfo.ch.
Sipas raportit 24-orësh të Policisë së Kosovës, i dyshuari është paraqitur më 23 tetor për intervistim në Prokurorinë Speciale të Republikës së Kosovës (PSRK).
Gjatë intervistimit, ai ka pranuar se paratë e sekuestruara i përkisnin atij, por nuk ka arritur të dëshmojë prejardhjen e tyre dhe lidhjen me personat e dyshuar që kishin bërë transportin e parave.
Me vendim të prokurorit, shtetasi gjerman është arrestuar dhe dërguar në mbajtje. Policia e ka cilësuar rastin si “Pjesëmarrje ose organizim i grupit kriminal të organizuar”.
Rasti daton më 24 shkurt 2026, kur në pikën kufitare në Merdarë autoritetet zbuluan dhe sekuestruan një milion euro të fshehura në një hapësirë të modifikuar brenda një automjeti të tipit Mercedes Sprinter, me targa të Shqipërisë, që po hynte në Kosovë nga Serbia.
Paratë u zbuluan nga një skaner i dhuruar Kosovës nga Shtetet e Bashkuara të Amerikës.
Hetimet lidhur me prejardhjen e shumës së parave dhe personat e përfshirë në transportin e tyre po vazhdojnë./Albinfo.ch
