Instituti Kombëtar i Shëndetësisë Publike të Kosovës (IKShPK) ka bërë të ditur se rastet e fruthit në vend po vazhdojnë të rriten, duke u bërë thirrje prindërve që të sigurohen se fëmijët e tyre janë të vaksinuar sipas kalendarit të imunizimit.
Sipas të dhënave të institutit, nga 16 prilli deri më 25 tetor 2026, në Kosovë janë konfirmuar gjithsej 242 raste me fruth. Vetëm gjatë javës së fundit janë regjistruar 18 raste të reja.
IKShPK-ja ka theksuar se më shumë se 95 për qind e personave të prekur nuk kanë qenë të vaksinuar me vaksinën MMR, e cila siguron mbrojtje ndaj fruthit, parotitit dhe rubeolës.
Fruthi është një sëmundje shumë ngjitëse, e cila mund të shkaktojë komplikime serioze, veçanërisht te fëmijët e vegjël. Sipas institutit, vaksinimi në kohë është ndër masat më të rëndësishme për parandalimin e sëmundjes dhe kufizimin e përhapjes së saj në komunitet.
Përmes vaksinimit mbrohen jo vetëm fëmijët e vaksinuar, por edhe foshnjat dhe personat që, për arsye shëndetësore, nuk kanë mundësi të marrin vaksinën.
Instituti u ka bërë thirrje prindërve që të kontrollojnë kartelat e vaksinimit të fëmijëve dhe, në rast se ndonjë dozë është lënë pa marrë, të kontaktojnë ekipet përkatëse shëndetësore për ta plotësuar atë sa më shpejt.
Ndërkohë, gjatë këtij viti, mbi 4 mijë e 6 fëmijë të moshës 2 deri në 5 vjeç janë vaksinuar në kuadër të aktiviteteve të imunizimit. Ky rezultat, sipas IKShPK-së, tregon rëndësinë e bashkëpunimit ndërmjet prindërve dhe profesionistëve shëndetësorë në mbrojtjen e shëndetit të fëmijëve.
IKShPK-ja ka ritheksuar se asnjë fëmijë nuk duhet të mbetet i pambrojtur për shkak të vaksinimit të vonuar apo të papërfunduar, duke bërë thirrje për angazhim të përbashkët të familjeve, personelit shëndetësor dhe institucioneve për të parandaluar përhapjen e mëtejshme të fruthit.
Instituti thekson se vaksinimi në kohë është një përgjegjësi e përbashkët dhe një hap thelbësor për mbrojtjen e shëndetit të fëmijëve dhe të gjithë komunitetit.
