Ndërtesa e re administrative në Emmen kushtoi rreth 192 milionë franga zvicerane. Kantoni pret të kursejë nëntë milionë franga në vit, ndërsa mungesa e parkingjeve për veturat private ka nxitur debat.
Kantoni i Lucernit në Zvicër ka inauguruar ndërtesën e re administrative në Emmen, ku do të përqendrohen rreth 30 njësi administrative kantonale. Projekti synon të rrisë efikasitetin e administratës dhe të ulë shpenzimet, duke bashkuar shërbimet që deri më tani kanë qenë të shpërndara në lokacione të ndryshme të kantonit.
Ndërtesa e re, e vendosur në zonën e Seetalplatz-it, do të shërbejë si vend pune për rreth 2.000 punonjës administrativë. Aty do të zhvendosen, ndër të tjera, zyra e pasaportave, zyra për bujqësi dhe pylltari, si dhe zyra e migracionit. Ndërkohë, qeveria kantonale, zyrat e stafit dhe parlamenti kantonal do të mbeten në qytetin e Lucernit.
Zhvendosja e punonjësve do të bëhet në disa faza, nga mesi i nëntorit 2026 deri në fund të shkurtit 2027.
Investim prej 192 milionë frangash
Ndërtesa e re administrative kushtoi rreth 192 milionë franga zvicerane dhe konsiderohet një nga projektet më të mëdha të centralizimit të administratës kantonale në Zvicër.
Drejtori i Financave i kantonit të Lucernit, Reto Wyss, e ka cilësuar projektin si një model me rëndësi kombëtare, i cili tashmë po tërheq interesimin edhe të kantoneve të tjera.
Sipas autoriteteve, centralizimi pritet të sjellë kursime vjetore prej rreth nëntë milionë frangash. Një pjesë e këtyre kursimeve do të vijë nga ndërprerja e kontratave të qirasë për objektet ku deri më tani kanë funksionuar zyrat administrative.
Gjithashtu, përqendrimi i shërbimeve në një ndërtesë të vetme pritet të lehtësojë bashkëpunimin ndërmjet njësive administrative, të shkurtojë kohën e udhëtimeve për punë dhe të mundësojë mbylljen e disa pikave të pritjes për qytetarët.
2.000 punonjës, por vetëm 1.200 vende pune
Një nga veçoritë e ndërtesës së re është organizimi fleksibil i hapësirave të punës. Rreth 2.000 punonjës do të ndajnë vetëm 1.200 vende pune.
Kjo është e mundur falë punës me orar të pjesshëm dhe punës nga shtëpia, të cilat u mundësojnë punonjësve të përdorin hapësirat e zyrave në ditë të ndryshme.
Megjithatë, një tjetër çështje ka ngjallur debat në komunën e Emmenit: numri i kufizuar i parkingjeve. Në të gjithë kompleksin janë paraparë vetëm 66 vende parkimi, të destinuara për automjetet e shërbimit dhe ato operative.
Debat për parkingjet
Banorët e Emmenit shqetësohen se punonjësit e administratës kantonale mund të zënë vendet e parkimit që aktualisht përdoren nga banorët e zonës.
Për këtë arsye, autoritetet komunale të Emmenit synojnë të rrisin tarifat e parkimit. Shtrenjtimi do të prekë edhe kartelat vjetore të parkimit, veçanërisht ato për personat që nuk banojnë në komunë.
Drejtori i Financave i Lucernit, Reto Wyss, ka bërë të ditur se mospërfshirja e parkingjeve për veturat private në projekt është një vendim i qëllimshëm.
Sipas tij, edhe aktualisht shumë njësi administrative nuk kanë parkingje për punonjësit. Për më tepër, zona e Seetalplatz-it ka lidhje të mira me transportin publik, përmes autobusëve dhe trenave.
“Ne kemi dashur të kontribuojmë në promovimin e transportit publik”, ka deklaruar Wyss.
Edhe kantonet e tjera po centralizojnë administratën
Lucerni nuk është kantoni i vetëm në Zvicër që po synon përqendrimin e shërbimeve administrative në objekte të reja.
Kantoni i Schwyzit planifikon të ndërtojë një qendër të re administrative dhe të sigurisë në zonën e Kaltbachut, me një investim prej rreth 140 milionë frangash.
Sipas autoriteteve të këtij kantoni, objekti i ri do të mundësojë mbylljen e rreth 12 lokacioneve ekzistuese administrative në zonën e luginës së Schwyzit, përfshirë disa hapësira të marra me qira. Kjo pritet të përmirësojë menaxhimin e administratës dhe të ulë shpenzimet në planin afatgjatë.
Ndërkohë, edhe kantoni i Basel-Landschaft-ut planifikon ndërtimin e një objekti të ri në zonën e Kreuzbodenit, në qytetin e Liestali-t, ku do të vendoset një pjesë e administratës.
Përmes këtyre projekteve, kantonet zvicerane synojnë të racionalizojnë hapësirat administrative, të përmirësojnë bashkëpunimin ndërmjet shërbimeve dhe të ulin kostot operative në afat të gjatë.
