Zvicra ka regjistruar rastet e para të transmetimit lokal të virusit Chikungunya. Katër persona në kantonin e Ticinos janë infektuar në zonën e rrafshinës së Magadinos, ndonëse nuk kishin udhëtuar kohët e fundit në vende ku virusi është i përhapur.
Sipas autoriteteve shëndetësore të kantonit, gjendja e të infektuarve është duke u përmirësuar, megjithëse ata vazhdojnë të kenë dhimbje të kyçeve.
Virusi Chikungunya transmetohet kryesisht përmes pickimit të mushkonjës tigër aziatike (Aedes albopictus). Mushkonjat vendase nuk e transmetojnë këtë virus.
Mushkonja tigër mund të infektohet duke pickuar një person që bart virusin dhe më pas ta përhapë atë te persona të tjerë përmes pickimeve. Pra, transmetimi nuk ndodh drejtpërdrejt nga një person te tjetri.
Kjo mushkonjë jeton kryesisht në zonat urbane dhe është më aktive gjatë ditës. Simptomat e sëmundjes zakonisht shfaqen rreth shtatë deri në nëntë ditë pas pickimit.
Pas konfirmimit të rasteve, në zonat e prekura kanë nisur hetimet epidemiologjike dhe masat për kontrollin e mushkonjës tigër, e cila shërben si bartëse e virusit. Veprimet po zhvillohen nën drejtimin e mjekut kantonal.
Simptomat dhe ecuria e sëmundjes
Në shumicën e rasteve, infeksioni me virusin Chikungunya kalon me ecuri të favorshme. Simptomat kryesore janë temperatura dhe dhimbjet e kyçeve, ndërsa mund të shfaqen edhe dhimbje muskulore, dhimbje koke dhe skuqje të lëkurës.
Rastet e rënda janë të rralla.
Autoritetet shëndetësore vlerësojnë se rreziku aktual për popullatën është shumë i ulët, për shkak të numrit të kufizuar të rasteve dhe përfundimit të afërt të sezonit të mushkonjave. Për momentin, nuk rekomandohen masa të veçanta për popullatën.
Çfarë duhet të kenë parasysh udhëtarët?
Personave që kthehen nga vendet tropikale dhe shfaqin temperaturë, dhimbje të kyçeve ose skuqje të lëkurës u rekomandohet të konsultohen me mjekun.
Gjatë 14 ditëve të para pas kthimit, këshillohet që të mbrohen nga pickimet e mushkonjave, me qëllim parandalimin e transmetimit lokal të virusit.
Sipas rekomandimeve të Komitetit të Ekspertëve Zviceranë për Mjekësinë e Udhëtimit, të publikuara në qershor të vitit 2026, vaksinimi rekomandohet për personat që udhëtojnë në rajone ku ka shpërthime të virusit Chikungunya.
Për qëndrime të gjata ose të përsëritura në rajone me rrezik të shtuar, vaksinimi mund të merret në konsideratë pas një vlerësimi individual të rrezikut, njofton Zyra Federale e Shëndetit Publik e Zvicrës.
Chikungunya, sëmundje e rrallë në Zvicër
Në Zvicër, çdo vit raportohen rreth 10 deri në 40 raste të infeksionit me virusin Chikungunya. Sipas të dhënave të autoriteteve shëndetësore të Ticinos, numri më i madh i rasteve është regjistruar në vitin 2025, kur u raportuan 89 raste, si pasojë e epidemive në disa vende të botës.
Të gjitha këto raste ishin importuar nga jashtë dhe nuk ishin rezultat i transmetimit lokal.
Që nga prilli i vitit 2026, në Zvicër është autorizuar vaksina Vimkunya kundër virusit Chikungunya për personat e moshës 12 vjeç e lart.
Edhe pse sëmundja zakonisht nuk paraqet rrezik të madh, komplikimet mund të shfaqen te personat e moshuar dhe ata që vuajnë nga sëmundje kronike.
Çfarë do të thotë fjala Chikungunya?
Sipas Organizatës Botërore të Shëndetësisë (OBSH), emri Chikungunya rrjedh nga gjuha e popullit Makonde, i cili jeton në juglindje të Tanzanisë dhe në veri të Mozambikut.
Fjala nënkupton «ai që ecën i përkulur», duke iu referuar vështirësive që shkaktojnë dhimbjet e forta të muskujve dhe kyçeve te personat e infektuar.
