Gjykata Supreme Federale e Zvicrës ka vendosur se autoritetet nuk mund të urdhërojnë bllokimin e faqeve të internetit pa një bazë të qartë ligjore.
Vendimi erdhi pas ankesës së kompanisë së telekomunikacionit Init7 ndaj një urdhri të Prokurorisë Publike të kantonit Vaud, e cila kishte kërkuar bllokimin e disa faqeve të dyshuara për mashtrime me investime. Përmes këtyre faqeve, investitorët dyshohet se ishin mashtruar për më shumë se 1.7 milionë franga zvicerane.
Gjykata konstatoi se legjislacioni aktual nuk ofron bazë të mjaftueshme për bllokime të tilla, përveç rasteve të përcaktuara shprehimisht me ligj, si ato që lidhen me lojërat e fatit dhe pornografinë me fëmijë.
Vendimi është mirëpritur nga organizatat për të drejtat digjitale, të cilat vlerësojnë se bllokimi i faqeve mund të cenojë lirinë e informimit dhe të përdoret në mënyrë arbitrare. Edhe kompania Init7 e ka cilësuar atë si një vendim të rëndësishëm për demokracinë dhe lirinë në internet.
Ndërkohë, autoritetet zvicerane po shqyrtojnë masa të reja kundër mashtrimeve online, përfshirë mundësinë e bllokimit të domeneve me prapashtesat .ch dhe .swiss në rrethana të caktuara. Këto masa po diskutohen në kuadër të rishikimit të Ligjit për Telekomunikacionin.
