Banka kombëtare e gjakut në Francë është bërë objekt i një sulmi kibernetik, i cili ka prekur sistemet e saj të ftohjes në tri qendra të ndryshme. Lajmi u bë i ditur nga institucioni francez i gjakut (EFS).
Sipas autoriteteve, hakerat kanë ndërhyrë në distancë në sistemet frigoriferike, të cilat menaxhohen nga një kompani e jashtme, duke shkaktuar rritje të konsiderueshme të temperaturës në ambientet e ruajtjes.
Gazeta franceze “Le Canard Enchaîné” raportoi se temperatura në pajisjet e prekura ka ndryshuar nga -30 gradë Celsius në +11 gradë.
Megjithatë, ndërhyrja u identifikua në kohë falë sistemeve të monitorimit dhe alarmit, duke bërë të mundur reagimin e shpejtë të autoriteteve dhe shmangien e dëmtimit të rezervave të gjakut dhe mostrave biologjike.
EFS konfirmoi se situata është vënë nën kontroll dhe se një pjesë e produkteve të gjakut është zhvendosur në ambiente të tjera, si masë parandaluese.
Institucioni francez administron dhe ruan produkte gjaku dhe mostra biologjike në pajisje të posaçme frigoriferike, përpara shpërndarjes së tyre në institucionet shëndetësore.
Ky incident vjen në vazhdën e sulmeve të ngjashme kibernetike të regjistruara gjatë ditëve të fundit në disa shtete evropiane. Pajisjet frigoriferike të supermarketeve në Belgjikë, Suedi, Irlandë, Luksemburg, Estoni, Finlandë, Gjermani dhe Holandë janë prekur nga ndërhyrje që kanë shkaktuar rritje të temperaturave.
Ndërkohë, në mesin e tetorit, një valë tjetër sulmesh kishte goditur sistemet frigoriferike të disa prej rrjeteve më të mëdha të supermarketeve në Francë.
Deri më tani, autoritetet nuk kanë identifikuar personat apo grupet përgjegjëse për këto sulme kibernetike.
