Me afrimin e sezonit të dimrit dhe rënien e temperaturave, rritet ndjeshëm edhe kërkesa për energji elektrike në vend. Për këtë arsye, KESCO ka apeluar te konsumatorët që ta përdorin energjinë në mënyrë sa më të kujdesshme dhe efikase.
Sipas të dhënave të KESCO-s, konsumi i energjisë elektrike te konsumatorët e rregulluar gjatë periudhës 1 shtator – 31 tetor 2026 është rritur për 4.1 për qind në krahasim me të njëjtën periudhë të vitit të kaluar.
Ndërkaq, ditët e para të nëntorit kanë shënuar një rritje edhe më të madhe, me afro 25 për qind më shumë konsum krahasuar me muajin paraprak.
KESCO thekson se kursimi i energjisë nuk nënkupton heqjen dorë nga ngrohja apo rehatia në shtëpi, por shmangien e shpenzimeve të panevojshme.
Qytetarëve u rekomandohet të mbajnë temperatura të arsyeshme në ambientet e banimit, të ngrohin vetëm hapësirat që përdorin dhe të shfrytëzojnë pajisjet elektrike në mënyrë efikase, duke i fikur ato kur nuk janë në përdorim.
Sipas kompanisë, këto veprime të thjeshta ndikojnë në uljen e faturave familjare dhe ndihmojnë në zvogëlimin e ngarkesës së rrjetit elektrik gjatë periudhave me konsum të lartë.
Në fund, KESCO u ka bërë thirrje të gjithë konsumatorëve që gjatë muajve të dimrit të tregojnë kujdes të shtuar në përdorimin e energjisë elektrike, duke theksuar se çdo kilovat-orë i kursyer ka rëndësi për familjet dhe për vendin.
