Platforma kosovare për mbështetje psikologjike “Mendje” ka marrë një vlerësim të rëndësishëm në nivel evropian, duke u shpërblyer me Çmimin e Inovacionit nga Komisioni Evropian, në një ceremoni të mbajtur në Bruksel.
Çmimi iu nda themelueses së platformës, Arbnora Kllokoqi, më 22 tetor 2026, nga Komisionerja Evropiane për Startup-et, Kërkimin dhe Inovacionin, Ekaterina Zaharieva.
Kllokoqi e cilësoi këtë çmim si një arritje të rëndësishme për të gjithë ekipin e “Mendje”, përfshirë psikologët që kontribuojnë në ofrimin e mbështetjes psikologjike.
Ajo theksoi se platforma lindi nga nevoja për t’u ofruar ndihmë personave që përballen me sfida emocionale dhe psikologjike, veçanërisht shqiptarëve që jetojnë jashtë vendit dhe që shpesh përjetimet e tyre i mbajnë në heshtje.
Sipas saj, ky vlerësim nga institucionet evropiane përfaqëson një hap të rëndësishëm për inovacionin që vjen nga Kosova dhe dëshmon se idetë e zhvilluara në vend mund të kenë ndikim përtej kufijve.
Ndarja e çmimit u bë në kuadër të Takimit Ministror të Platformës Drejtuese të Ballkanit Perëndimor për Kërkim dhe Inovacion, ku ishin të pranishëm ministra të vendeve të rajonit, përfaqësues të shteteve anëtare të Bashkimit Evropian dhe drejtues të institucioneve evropiane.
Ky vlerësim e vendos platformën “Mendje” në vëmendjen e institucioneve evropiane, duke përfaqësuar një tjetër sukses të sipërmarrjes dhe inovacionit nga Kosova.
