Kryeministri i Kosovës, Albin Kurti, ka deklaruar se gjatë vitit 2025 gjithsej 171 mjekë janë kthyer për të jetuar dhe punuar në Kosovë, duke e cilësuar këtë si një zhvillim pozitiv për sektorin e shëndetësisë, përcjell albinfo.ch.
Këtë deklaratë Kurti e bëri të shtunën, më 7 nëntor, gjatë hapjes së edicionit të katërt të “Swiss Medical School”, që po mbahet në Prishtinë, nën organizimin e Lidhjes së Mjekëve Shqiptarë në Zvicër.
Duke folur për largimin e profesionistëve shëndetësorë nga vendi, kryeministri tha se, krahas dukurisë së njohur si “ikja e trurit”, vitet e fundit po vërehet edhe një prirje e kundërt, ajo e kthimit të profesionistëve në Kosovë.
Kurti ka shprehur mirënjohje për mjekët që kanë vendosur të kthehen dhe të vazhdojnë karrierën në Kosovë, por edhe për ata që punojnë jashtë vendit dhe kontribuojnë përmes ligjëratave, trajnimeve dhe bashkëpunimit me institucionet shëndetësore.
Gjatë fjalës së tij, ai ka përmendur edhe investimet në sektorin e shëndetësisë, përfshirë mbi 5.5 milionë euro në Gjinekologji, rreth 1.45 milionë euro në Kardiologjinë Invazive dhe mbi tre milionë euro në Neurokirurgji dhe Kirurgji Vaskulare.
Kryeministri ka theksuar gjithashtu se buxheti për Listën e Barnave Esenciale është rritur nga 35 milionë euro në vitin 2019 në 64 milionë euro këtë vit, ndërsa ai për barnat e pacientëve onkologjikë nga 8 në 22 milionë euro.
Edicioni i katërt i “Swiss Medical School”, që zhvillohet në Hotel Emerald në Prishtinë, mbledh mjekë dhe profesionistë të shëndetësisë nga Kosova dhe diaspora, veçanërisht nga Zvicra, me qëllim shkëmbimin e njohurive, përvojave dhe avancimin e bashkëpunimit profesional.
