Shoferët që qarkullojnë me shpejtësi tepër të ulët në disa autostrada të Italisë mund të përballen me gjoba deri në 160 euro.
Sipas raportimeve të mediave italiane dhe zvicerane, propozimi synon të përmirësojë rrjedhën e trafikut dhe të shmangë pengesat në qarkullim, përcjell albinfo.ch.
Masa parasheh shpejtësi minimale prej 100 km/h në korsinë pranë ndarëses së mesit, në autostradat që kanë së paku tri korsi në secilin drejtim.
Megjithatë, kufizimi nuk do të zbatohet në raste të mjegullës së dendur, reshjeve të mëdha, aksidenteve, punimeve në rrugë apo kolonave të automjeteve. Përjashtime do të ketë edhe kur sinjalistika rrugore përcakton ndryshe.
Propozimi pritet të përfshihet në legjislacionin e ri rrugor italian./Albinfo.ch
