Presidentja e Kosovës, Justina Shiroka Pula, ka pritur të shtunën, më 7 nëntor, Besiana Kadarenë, vajzën e shkrimtarit të njohur shqiptar Ismail Kadare, me të cilën ka diskutuar për trashëgiminë e tij letrare dhe kulturore, përcjell albinfo.ch.
Takimi është zhvilluar në kuadër të ekspozitës “Kosova e Kadaresë”, e cila është hapur në Bibliotekën Kombëtare të Kosovës “Pjetër Bogdani”, me rastin e 90-vjetorit të lindjes së shkrimtarit.
Gjatë bisedës, presidentja Shiroka Pula ka vlerësuar rëndësinë e kësaj ekspozite për ruajtjen dhe promovimin e veprës së Kadaresë, si dhe për njohjen e lidhjeve të veçanta që ai kishte me Kosovën.
Ekspozita sjell para publikut dokumente, dorëshkrime, letra dhe objekte personale të shkrimtarit, disa prej të cilave prezantohen për herë të parë nga arkivi familjar.
Në mesin e materialeve të veçanta është edhe dorëshkrimi i ditarit të Kadaresë, të mbajtur gjatë luftës në Kosovë, i cili më vonë u botua me titullin “Ra ky mort e u pamë”. Dorëshkrimi i është dhuruar Bibliotekës Kombëtare të Kosovës.
Ekspozita synon të sjellë më afër publikut jo vetëm krijimtarinë letrare të Ismail Kadaresë, por edhe angazhimin e tij intelektual dhe lidhjen e vazhdueshme me Kosovën.
