Një organizatë e dyshuar kriminale, e përbërë kryesisht nga shtetas shqiptarë dhe e përfshirë në trafikun ndërkombëtar të drogës, është goditur nga autoritetet italiane në kuadër të operacionit të koduar “Caveau 38”, përcjell albinfo.ch.
Hetimet e zhvilluara nga Guardia di Finanza në Lecco, nën koordinimin e Prokurorisë Antimafia të Milanos dhe në bashkëpunim me SPAK-un në Shqipëri, kanë zbuluar një rrjet që dyshohet se vepronte mes Shqipërisë, Italisë, Holandës dhe Gjermanisë.
Në kuadër të operacionit janë vënë nën hetim 52 persona, ndërsa gjashtë të tjerë janë arrestuar në flagrancë. Autoritetet kanë sekuestruar rreth 32 kilogramë lëndë narkotike, përfshirë kokainë, heroinë dhe marihuanë, si dhe mbi 1,5 milionë euro para të gatshme.
Gjatë kontrolleve janë zbuluar gjithashtu tetë kilogramë lingota ari në dy kompani të përpunimit të metaleve të çmuara në Milano dhe Alessandria.
Sipas hetimeve, gjatë periudhës 2019 deri më 2022, rrjeti dyshohet se ka trafikuar rreth 240 kilogramë kokainë drejt Italisë, ndërsa mbi 14 milionë euro të përfituara nga aktiviteti i paligjshëm janë transferuar drejt Shqipërisë.
Hetimi kishte nisur pas kontrolleve ndaj shpërndarjes së drogës në parqet publike të Cernusco Lombardone dhe Merate. Më pas, hetuesit zbuluan një strukturë më të gjerë të dyshuar të trafikimit ndërkombëtar.
Sipas autoriteteve, droga dhe paratë transportoheshin përmes automjeteve dhe kamionëve me hapësira të fshehta, ndërsa anëtarët e grupit përdornin komunikime të koduara për të koordinuar aktivitetin.
Një nga bazat e dyshuara të organizatës ndodhej në Burago Molgora, ku ruheshin shumat e parave përpara transportimit drejt Shqipërisë. Nga numri 38 i adresës së kësaj banese ka marrë emrin edhe operacioni “Caveau 38”.
Hetimet janë zhvilluar në bashkëpunim mes autoriteteve italiane dhe strukturave të specializuara shqiptare, me qëllim identifikimin e personave të përfshirë dhe gjurmimin e të ardhurave të dyshuara nga aktiviteti kriminal. /Albinfo.ch
