Partia për Veprim Demokratik – Aleanca për Luginën (PVD-AL) ka dalë e para sipas rezultateve preliminare të zgjedhjeve për Këshillin Kombëtar Shqiptar (KKSH), të mbajtura në Preshevë, Bujanoc dhe Medvegjë.
Këtë e ka bërë të ditur Enkel Rexhepi, i cili do ta udhëheq KKSH-në edhe për një mandat, transmeton albinfo.ch.
Rexhepi përmes një postimi në profilin e tij zyrtar në rrjetin social Facebook, ka bërë të ditur se ky koalicion ka arritur që të sigurojw 10 nga 29 mandate sa janë gjithsej në KKSH.
“Faleminderit nga zemra për besimin që na dhatë në Preshevë, Bujanoc e Medvegjë. Jam mirënjohës për secilën kandidate, secilin kandidat dhe të gjithë aktivistët e Partisë për Veprim Demokratik dhe Aleancës për Luginën që punuan krah për krah gjatë kësaj fushate.
I uroj edhe listat e tjera për rezultatet që arritën. Do t’i nis menjëherë bisedimet me përfaqësuesit e tyre për konstituimin e Këshillit Kombëtar Shqiptar.
Në Këshill na pret punë e përbashkët për shkollën e librin shqip, për kulturën tonë dhe për të drejtën që gjuhën shqipe ta përdorim në institucione.
Me Besë e me Zemër!.
