Një skandal i madh financiar është zbuluar në Greqi, ku një rrjet i dyshuar evazioni fiskal ka grumbulluar mbi 206 milionë euro detyrime të papaguara ndaj shtetit dhe fondeve të sigurimeve shoqërore, përcjell albinfo.ch.
Sipas mediave greke, hetimet e autoriteteve tatimore kanë zbuluar një skemë të organizuar që vepronte kryesisht në Selanik dhe Halkidiki, duke përfshirë biznese të gastronomisë dhe lokale të njohura të jetës së natës.
Në kuadër të hetimeve janë identifikuar 917 kompani, prej të cilave 860 rezultojnë me detyrime të konfirmuara. Dosja hetimore përfshin 1.283 persona të akuzuar, ndërsa detyrimet financiare arrijnë në rreth 206.2 milionë euro.
Një nga zbulimet më të pazakonta të hetimit lidhet me përdorimin e identiteteve të 12 personave të vdekur. Sipas autoriteteve, në emër të tyre dhe të kompanive të lidhura me ta vazhdonin të lëshoheshin fatura edhe muaj apo vite pas vdekjes.
Hetuesit kanë konstatuar gjithashtu se persona me të ardhura shumë të ulëta, përfshirë kamerierë, punëtorë kuzhine dhe individë në gjendje të rëndë ekonomike, figuronin si administratorë të dhjetëra kompanive me borxhe milionëshe.
Në disa raste, personat që dyshohet se kontrollonin realisht bizneset paraqiteshin zyrtarisht si punonjës sigurie, portierë apo këshilltarë, ndërsa përgjegjësitë financiare regjistroheshin në emër të personave të tjerë.
Hetimet kanë zbuluar se disa biznese vazhdonin aktivitetin në të njëjtat ambiente, por ndryshonin vazhdimisht kompaninë administruese, duke lënë pas detyrime tatimore dhe kontribute të papaguara.
Operacioni i autoriteteve greke ka çuar në arrestimin e 18 personave, ndërsa hetimet vazhdojnë për të përcaktuar përgjegjësitë individuale dhe përmasat e plota të skemës.
Personat e përfshirë në dosje mbeten të dyshuar ose të akuzuar deri në një vendim përfundimtar të drejtësisë. /Albinfo.ch
