Kryetarja e Preshevës, Ardita Sinani, ka reaguar pas përfundimit të zgjedhjeve për Këshillin Kombëtar Shqiptar, duke bërë të ditur rezultatet preliminare të listës së udhëhequr nga Enkel Rexhepi.
Sipas Sinanit, lista me numër 3 ka siguruar gjithsej 4.769 vota, prej të cilave 3.271 në Preshevë. Me këtë rezultat, ajo ka fituar 10 nga gjithsej 29 mandatet në Këshillin Kombëtar Shqiptar.
Përmes një reagimi publik, Sinani ka falënderuar qytetarët e Preshevës, Bujanocit dhe Medvegjës për pjesëmarrjen dhe mbështetjen e treguar gjatë procesit zgjedhor. Ajo gjithashtu ka përgëzuar Enkel Rexhepin, kandidatët dhe aktivistët e Partisë për Veprim Demokratik dhe Aleancës për Luginën për angazhimin e tyre.
Sinani ka bërë të ditur se pas shpalljes së rezultateve do të fillojnë menjëherë konsultimet me listat e tjera, me synimin për të formuar dhe konstituuar Këshillin Kombëtar Shqiptar.
Ajo ka theksuar se ky institucion duhet të jetë përfaqësues i të gjithë shqiptarëve të Luginës së Preshevës, duke vënë në fokus avancimin e arsimit në gjuhën shqipe, ruajtjen e kulturës dhe garantimin e përdorimit zyrtar të gjuhës shqipe.
