Bartësi i listës së Koalicionit Shqiptar në zgjedhjet parlamentare në Serbi, Shaip Kamberi, ka deklaruar se pasivizimi i adresave ka ndikuar në uljen e përfaqësimit politik të shqiptarëve, duke ua pamundësuar synimin për të fituar mandatin e tretë.
Në një lidhje të drejtpërdrejtë për RTK-në, pak para përfundimit të procesit të votimit, Kamberi bëri të ditur se, sipas të dhënave preliminare të orës 19:00, në 37 vendvotime në Preshevë kishin votuar 16.600 qytetarë, ndërsa në vendvotimet shqiptare në Bujanoc ishin regjistruar 10.853 votues.
Ai vlerësoi se procesi zgjedhor kishte ecur përgjithësisht në mënyrë të rregullt, ndonëse në orët e para ishin evidentuar disa parregullsi të vogla.
Duke folur për mundësinë e sigurimit të mandatit të dytë, Kamberi theksoi se rezultati do të varet edhe nga niveli i pjesëmarrjes në zgjedhjet në Serbi.
“Nëse pjesëmarrja arrin në 70 për qind, siç po flitet, atëherë do të nevojiten më shumë vota. Nëse pjesëmarrja është 61 deri në 65 për qind, kemi gjasa shumë reale për ta fituar ulësen e dytë”, u shpreh ai për RTK-në.
Kamberi foli edhe për pasivizimin e adresave, duke pretenduar se personat e prekur nga ky proces janë larguar gjithashtu nga listat e votuesve.
Sipas tij, kjo ka ndikuar drejtpërdrejt në mundësinë e Koalicionit Shqiptar për të siguruar mandatin e tretë, të cilin e kishte synuar në këto zgjedhje.
Ai e cilësoi këtë praktikë si një formë të diskriminimit sistematik ndaj shqiptarëve në Luginën e Preshevës, duke veçuar Medvegjën si një nga zonat ku, sipas tij, pasivizimi i adresave ka ndikuar në rezultatet zgjedhore.
Në fund, Kamberi falënderoi qytetarët për mobilizimin dhe angazhimin e tyre në procesin zgjedhor, me theks të veçantë te shqiptarët që udhëtuan nga Kosova për të votuar.
Ai tha se mbështetja dhe reagimet nga hapësirat shqiptare gjatë ditëve të fundit të fushatës kishin shërbyer si motivim shtesë për votuesit.
