Zgjedhjet e parakohshme parlamentare në Serbi po shoqërohen me një pjesëmarrje të lartë të qytetarëve. Sipas të dhënave të publikuara nga IPSOS dhe Qendra për Zgjedhje të Lira dhe Demokraci (CeSID), deri në orën 19:00, në votime kishin marrë pjesë 67.6% e votuesve.
Këto shifra u publikuan në llogarinë zyrtare të CeSID në platformën X, duke treguar interes të madh të qytetarëve për procesin zgjedhor.
Ndërkohë, Komisioni Republikan Zgjedhor i Serbisë bëri të ditur se deri në orën 18:00 pjesëmarrja kishte arritur në 64.89%. Nivelet më të larta të votimit u shënuan në rajonin e Vojvodinës dhe në Beograd.
Krahasuar me zgjedhjet parlamentare të vitit 2023, pjesëmarrja këtë vit rezulton dukshëm më e lartë. Sipas të dhënave të IPSOS dhe CeSID, në zgjedhjet e mëparshme, deri në orën 18:00 kishin votuar 55.9% e qytetarëve me të drejtë vote.
Në garën zgjedhore të këtij viti marrin pjesë gjithsej 18 lista zgjedhore. Megjithatë, procesi është shoqëruar edhe me raportime për incidente në disa qendra votimi, duke ngritur shqetësime për zhvillimin e rregullt të zgjedhjeve.
Për situatën ka reaguar edhe Bashkimi Evropian, i cili u ka bërë thirrje të gjitha palëve të tregojnë maturi, të ruajnë qetësinë dhe të shmangin dhunën dhe provokimet.
