Ambasadorja e Bashkimit Evropian në Shqipëri, Sofia Moreira de Sousa, i ka dorëzuar ministrit për Evropën dhe Punët e Jashtme, Ferit Hoxha, progresraportin e Komisionit Evropian për vitin 2026, përcjell albinfo.ch.
Ministri Hoxha e ka cilësuar raportin si një vlerësim gjithëpërfshirës të përparimit të Shqipërisë në rrugën drejt anëtarësimit në Bashkimin Evropian, duke theksuar se vendi ka shënuar progres të rëndësishëm, por ende përballet me sfida që kërkojnë angazhim të vazhdueshëm.
Një nga pikat kryesore të raportit është objektivi i Shqipërisë për përfundimin e negociatave të anëtarësimit deri në fund të vitit 2027. Ky synim është vlerësuar nga Komisioni Evropian si ambicioz, por i arritshëm, me kusht që vendi të vazhdojë zbatimin e reformave të nevojshme.
Nga ana e saj, ambasadorja Moreira de Sousa ka vlerësuar përputhjen e plotë të Shqipërisë me politikën e përbashkët të jashtme dhe të sigurisë të Bashkimit Evropian. Ajo ka theksuar gjithashtu rëndësinë që qytetarët të informohen për përfitimet konkrete që sjellin reformat e integrimit evropian.
Hoxha ka ritheksuar përkushtimin e institucioneve shqiptare për të përmbushur standardet evropiane, duke nënvizuar se përparimi drejt anëtarësimit kërkon reforma cilësore dhe rezultate të qëndrueshme. /Albinfo.ch
