Më 14 nëntor 2026, në Gjenevë do të organizohet promovimi i librit «Për Kosovën Republikë», të autorit Enver Dugolli, një aktivitet kulturor që synon të vërë në pah kujtesën historike, qëndresën politike dhe përpjekjet për lirinë dhe pavarësinë e Kosovës.
Mbrëmja do të sjellë në vëmendje një kapitull të rëndësishëm të historisë bashkëkohore të Kosovës, përmes dëshmive dhe përvojave të autorit, Enver Dugolli, ish-i burgosur politik dhe i mbijetuar i masakrës së burgut të Dubravës.
Aktualisht, Dugolli ushtron detyrën e zëvendësministrit të Punëve të Brendshme në Qeverinë e Republikës së Kosovës.
Përtej dimensionit letrar, libri përfaqëson një dëshmi mbi përvojat personale dhe kolektive të një periudhe të karakterizuar nga represioni politik, qëndresa dhe angazhimi për realizimin e idealit të Kosovës Republikë.
Gjatë mbrëmjes, pjesëmarrësit do të kenë mundësinë të bashkëbisedojnë me autorin dhe të ndajnë reflektime mbi rëndësinë e dokumentimit dhe përcjelljes së kujtesës historike te brezat e rinj.
Programi do të pasurohet me një paraqitje artistike nga SHKA «Ilirët» nga Lozana.
Në aktivitet pritet të marrin pjesë përfaqësues të institucioneve, personalitete, mysafirë nga Kosova dhe vende të tjera, si dhe pjesëtarë të komunitetit shqiptar në Zvicër.
Promovimi i librit organizohet në kuadër të angazhimit për promovimin e kulturës, letërsisë dhe kujtesës historike shqiptare në diasporë, duke krijuar ura komunikimi ndërmjet brezave dhe hapësirave kulturore.
Data: E shtunë, 14 nëntor 2026
Ora: 19:00
Vendi: SWISS UMEF Adresa: 187, Route d’Aïre, 1219 Aïre, Genève
Jeni të mirëseardhur për ta përcjellë këtë aktivitet me rëndësi historike. Për informacione dhe kontakte mediatike: Organizatorët: Shoqata kulturore Dora d’Istria; Lidhja e shkrimtarëve dhe krijuesve shqiptarë në mërgatë; Shoqëria kulturore artistike « Ilirët » nga Lozana info@dora-distria.ch Sponzor medial, Albinfo.ch.
