Futbollisti shqiptar, Albian Ajeti, do të mungojë në tri ndeshjet e ardhshme të Luganos, pasi Liga Zvicerane e Futbollit (SFL) ka vendosur ta dënojë për ndërhyrjen e ashpër ndaj kundërshtarit në ndeshjen kundër St. Gallenit.
Sulmuesi 29-vjeçar u përjashtua me karton të kuq në minutën e 11-të të takimit të zhvilluar të dielën, më 8 nëntor, pasi ndërhyri në mënyrë të rrezikshme ndaj futbollistit Hugo Vandermersch, transmeton albinfo.ch.
Sipas autoriteteve disiplinore të futbollit zviceran, ndërhyrja e Ajetit është vlerësuar si faull i rëndë, me rrezik të lartë për sigurinë fizike të kundërshtarit. Futbollisti i St. Gallenit arriti ta vazhdonte ndeshjen pas trajtimit mjekësor.
Përballja përfundoi me humbjen e thellë të Luganos, 5:0, duke i dhënë fund serisë së rezultateve pozitive të skuadrës së drejtuar nga Mattia Croci-Torti.
Vendimi disiplinor nënkupton se Ajeti pritet të mungojë në dy ndeshjet e ardhshme të kampionatit zviceran, kundër Grasshoppers më 21 nëntor dhe Luzernit më 29 nëntor, si dhe në përballjen e 2 dhjetorit kundër St. Gallenit, në kuadër të 1/8 së finales së Kupës së Zvicrës.
Megjithatë, drejtuesit e Luganos ende nuk kanë vendosur nëse do ta apelojnë dënimin.
Sipas mediave zvicerane, klubi mund të marrë parasysh edhe një rast të ngjashëm nga mesi i shtatorit, kur futbollisti Elias Pihlström ishte dënuar me vetëm dy ndeshje moslojë për një ndërhyrje të ngjashme, po ashtu kundër St. Gallenit.
Mungesa e Ajetit përbën një goditje për Luganon, që aktualisht kryeson Superligën zvicerane me 34 pikë pas 13 ndeshjeve, gjashtë më shumë se Young Boys. Sulmuesi shqiptar ka shënuar gjashtë gola në kampionat këtë sezon dhe është një nga lojtarët e rëndësishëm të repartit ofensiv të skuadrës nga Ticino.
